Presidenti amerikan Donald Trump ka njoftuar se avokati i tij personal Rudy Giuliani ka dalë pozitiv me Covid-19.
Trump shkruan ndër të tjera në “Twitter” se Guliani ka rezultuar pozitiv me ‘virusin e Kinës’, dhe së është një person që ka punuar pa u lodhur në zgjedhjet e SHBA-së të cilat i ka konsideruar si më të korruptuar të të gjitha kohërave.
“Rudy Giuliani, deri tani kryebashkiaku më i madh në historinë e New York, i cili ka punuar pa u lodhur duke ekspozuar zgjedhjet më të korruptuara (deri tani!) në historinë e SHBA-ve, ka rezultuar pozitiv me virusin e Kinës. Shpresoj të shëroheni sa më shpejtë Rudy, ne do të vijojmë rrugën tonë më tej!”, shkruan Trump.
Giuliani shpesh shihej pa maska teksa bisedonte me persona me të cilët ulej vetëm disa centimetra larg.
Djali i Giuliani, Andrew, gjithashtu doli pozitiv me COVID-19 muajin e kaluar. Në përgjithësi, sipas New York Magazine , më shumë se 60 persona kanë rezultuar të infektuar me Covid-19 në ‘orbitën’ e Presidenti, përfshirë dhe vetë Trump me zonjën e parë Melania Trump.
Giuliani, i cili ka udhëhequr sfidat ligjore të fushatës Trump për rezultatet e zgjedhjeve 2020, është personi i fundit në rrethin e ngushtë të presidentit që është infektuar. Presidenti dhe ekipi i tij janë kritikuar për shmangien e udhëzimeve të sigurisë.
SHBA aktualisht ka numrin më të lartë të rasteve COVID-19 në botë, me më shumë se 14 milion raste të konfirmuara dhe gati 282 mijë viktima.
g.kosovari
