Një stuhi ka përfshirë mbrëmjen e kaluar qarkun e Korçës, duke sjellë reshje intensive shiu, erë të fortë dhe në disa zona edhe breshër. Kushtet e rënduara atmosferike kanë shkaktuar dëme në bujqësi, probleme në qarkullim dhe incidente me rrëzimin e pemëve.
Në fushën e Maliqit, fermerët shprehen të shqetësuar për dëmet e mundshme në kulturat bujqësore, veçanërisht te gruri, i cili ndodhet në fazën e korrjes.
Në fshatin Rëmbec të Maliqit, një pemë është rrëzuar mbi një automjet, duke shkaktuar dëme të konsiderueshme materiale. Forcat e Stacionit të Mbrojtjes nga Zjarri dhe Shpëtimit, së bashku me efektivët e Policisë dhe banorët e zonës, ndërhynë për largimin e pemës dhe normalizimin e situatës.
Një tjetër rast i ngjashëm është raportuar edhe në qytetin e Maliqit, ku gjithashtu një pemë ra mbi një automjet. Në fshatin Kamnik të Bashkisë Kolonjë, reshjet intensive të breshërit, që zgjatën rreth 15 minuta, kanë dëmtuar vreshtat, të cilat përbëjnë një nga burimet kryesore të të ardhurave për banorët e zonës.
Fermerët e zonës shprehen se kjo është hera e gjashtë radhazi që breshëri dëmton kulturat bujqësore në Kolonjë, Devoll, Korçë dhe Maliq.
Sipas tyre, pavarësisht evidentimit të dëmeve dhe dërgimit të dokumentacionit pranë institucioneve përgjegjëse, deri më sot nuk kanë përfituar dëmshpërblim.
Në Bashkinë Pustec raportohet ndërprerje e energjisë elektrike në katër fshatra, ndërsa ekipet e OSHEE-së ndodhen në terren për riparimin e defekteve.
Ndërkohë, në bashkitë Korçë dhe Pogradec nuk janë raportuar dëme apo situata emergjente.
