Ministri Saimir Tahiri njihet për idetë e tij novative dhe shpesh befasuese dhe sot ka qenë një nga ato raste. Në përfundim të një konference për mediat tepër serioze ku ka folur për kanabisin dhe ndryshimet e kodit penal, ministri ka lënë sallën por është kthyer sërish menjëherë por me një tufë lule për gazetaren e News24 e Balkanweb, Dorjan Bezat. Duket se me gjithë kritikat për mediat, Tahiri nuk e ka harruar ditëlindjen e gazetares.
E pyetur nëse e priste këtë dhuratë nga Ministri i Brendshëm, gazetarja tha se është befasuar pasi për të ka qenë një ditë krejt normale.
“Nuk e prisja aspak! Për mua ishte një ditë normale pune. Ndoqa konferencën, mbajta shënime dhe në mbarim isha duke biseduar me kolegët. Isha me shpinë dhe se pashë që ministri po afrohej me lulet, vetëm kur më thirri në emër u ktheva. U befasova vërtet. Më tha gëzuar dhe qofsh përherë e lumtur”, ka treguar gazetarja Bezat.
