Alban Hoxha është heroi i Partizanit në Champions League, teksa ka vendosur kualifikimin në Budapest, përballë kampiones së Hungarisë, Ferencvarosi.
Një kualifikim që ndoshta e besonin vetëm të kuqtë, pas barazimit 1-1 në Elbasan, pasi nuk është në traditën e skuadrave shqiptare të përmbysin rezultate jashtë, përballë kundërshtarëve me nivel.
Hungarezët kaluan në epërsi me një penallti të shënuar nga Gera në minutën e 14-të, ndërsa të kuqtë humbën dy raste të mira, por më pas morën një dhuratë nga Hüsing, i cili shënoi autogol, pesë minuta para pushimit.
Ndeshja nuk pati më gola deri në përfundim të 120 minutave, dhe skuadrat iu drejtuan penalltive.
Alban Hoxha gjuajti i pari dhe tundi rrjetën me një “Panenka”, duke harkuar mbi portierin kundërshtar. Më pas, bëri detyrën e zakonshme, teksa priti dy penallti, ndërkohë që Vila gjuajti jashtë. Pas një goli të hungarezëve, shifrat shkuan në 3-1 dhe Hoxha priti penalltinë përcaktuese, duke dërguar Partizanin në turin tjetër.
Përballë të kuqve tani do të jetë një kundërshtar edhe më i fortë, kampioni i Austrisë, RB Salzburg.
d.i.
