Përplasja mes demokratëve te Komisioni i Medias ishte një nga skenat më të komentuara politike këtë javë. Njëri nga “protagonistët” ishte kreu i grupit parlamentar të PD-së Gazment Bardhi.
I ftuar sonte në “Opinion” në Tv Klan ai shpreh keqardhje për tonet e larta ndaj koleges së tij, por nga ana tjetër thekson se ishte një “shpërthim i sinqertë”.
Sipas Bardhit, demokratët nuk mund të vendosen përballë njëri-tjetrit kur aksioni është kundër partisë në pushtet. Ai e cilësoi të gjithë situatën në atë mbledhje e cila nuk u zhvillua deri në fund, si një strategji tjetër e Lulzim Bashës.
-A mendon që është një skenë elektorale kjo?
Gazment Bardhi: Deputetja tjetër është mike e imja dhe shpërthimi është aq i sinqertë sa të ishin përballë dy miq.
-A mund ta kishim mbajtur pak sinqeritetin se…?
Gazment Bardhi: Unë kam një zakon politik zoti Fevziu që nuk jam ndryshe para kamerave dhe ndryshe pas kamerave.
-Kshu thotë dhe Rama…
Gazment Bardhi: Këtë e kam, jam i njëjti në çdo moment. Aty kam thënë atë që kam ndjerë, nuk kam patur gjë me kolegen.
-A ndihesh keq për skenën?
Gazment Bardhi: Absolutisht ndihem i keqardhur, do doja që skena të mos ndodhte, kjo ka qenë arsyeja pse për 10 minuta pa filluar mbledhja i jam lutur zonjës Açka për të mos e vijuar mbledhjen, kishte një këmbëngulje, nuk e kuptova pse, megjithëse tashmë e kam kuptuar, është një strategji e zotit Basha.
/a.r
