Organizata Botërore e Shëndetësisë ka lëshuar një paralajmërim për “një rrezik të madh biologjik”, pasi luftëtarët sudanezë mësynë Laboratorin e Shëndetit Publik në kryeqytetin Khartoum.
Ndërkohë që në luftimet vijojnë, një numër i konsiderueshëm shtetesh kanë nisur evakuimin e qytetarëve të tyre nga “zona e nxehtë.”
CNN, duke cituar burime nga një zyrtar i lartë mjekësor raporton se laboratori, në të cilin ndodhen kampione të sëmundjeve të ndryshme dhe materiale të tjera gjenetike, është marrë nga forcat RSF.
Nima Saeed Abid, përfaqësuesja e OBSH-së në Sudan, e përshkroi ngjarjen si “ekstremisht të rrezikshme” pasi në atë laborator ka edhe kampionë të poliomielitit dhe kolerës ndër të tjera.
Në një deklaratë për CNN, OBSH tha se teknikët e trajnuar të laboratorit nuk kanë më akses në laborator” dhe se objekti kishte pësuar ndërprerje të energjisë. Kjo do të thotë se laboratori nuk ka më kushtet e duhura për t’i mbajtur siç duhet materialet biologjike.
“Duhet një ndërhyrje urgjente ndërkombëtare për të rikthyer elektricitetin dhe për ta siguruar laboratorin nga çdo formë përplasjeje, pasi po përballemi me një kërcënim të vërtetë biologjik,” citoi më tej CNN burimin e sa saj.
Numri i njerëzve të vrarë në Sudan që nga nisja e përplasjeve 11 ditë më parë ka shkuar në të paktën 459, sipas shifrave të OBSH-së. Ndërsa, 4,072 persona kanë mbetur të lënduar.
/a.r
