Kryeministri i Kosovës, Albin Kurti, ka thënë se së shpejti pritet të normalizohet furnizimi me ujë në komunat e Fushë Kosovës, Drenasit dhe Obiliqit.
Përmes një postimi në Facebook, Kurti po ashtu ka thënë se prurjet e ujit në KEK kanë arritur në nivele optimale për furnizim me ujë të termocentralit “Kosova B”.
“Ka rifilluar furnizimi i fabrikave të ujit në rajonet e Mitrovicës dhe Prishtinës. Ka filluar furnizimi me ujë për qytetarët e komunave të Skenderajt, Mitrovicës së Jugut, Mitrovicës së Veriut dhe Zveçanit. Së shpejti pritet të normalizohet furnizimi me ujë për qytetarët në Fushë Kosovë, Drenas dhe Obiliq”, ka shkruar Kurti.
Ndërkohë, ministrja e Ekonomisë Artane Rizvanolli, ka thënë se furnizimi me ujë për zonat e prekura nga sulmi terrorist në kanalin e Ibër-Lepencit është duke u kthyer në normalitet.
Përmes një postimi në rrjetin social Facebook, Rizvanolli ka thënë se mbrëmë në orët e vona ka filluar furnizimi me ujë në komunat e Mitrovicës së Jugut, Mitrovicës së Veriut dhe të Zveçanit.
Qeveria e Kosovës thotë se shpërthimi që ka ndodhur të premten në kanalin e ujit të Ibër-Lepencit në fshatin Vragë të Zubin Potokut, është sulm i dirigjuar e orkestruar nga Serbia dhe i kryer nga profesionistë.
Rizvanolli ka bërë të ditur se pavarësisht dëmtimit që shpërthimi shkaktoi në kanalin e Ibër-Lepencit, kanë arritur të sigurojnë energji elektrike për vendin përmes vendosjes së gjashtë gypave të përkohshëm, me kapacitet të mjaftueshëm për të siguruar ujë për ftohjen e termocentralit “Kosova B”.
