Zëvendëspresidenti i SHBA-së, J.D. Vance, ka reaguar për sulmin në Minesota me një viktimë të cilën e cilësoi si një “tragjedi”, që sipas tij, mbajnë përgjegjësi “gruaja dhe ekstremistët që besojnë se imigracioni është i vetmi ligj ndaj të cilit protestuesit mund të ndërhyjnë”.
Ai reagoi ndaj analizës së një avokati mbi pamjet video të incidentit, duke argumentuar se “agjentët nuk po vepronin në mënyrë të rastësishme, por po i afroheshin automjetit të saj sepse ajo po shkelte ligjin, konkretisht duke penguar një operacion të zbatimit të ligjit”.
Ish-sekretarja amerikane e Shtetit, Hillary Clinton, shprehu një qëndrim të kundërt, duke e quajtur ngjarjen një “vrasje” në një postim në X dhe duke lavdëruar protestuesit që dolën në rrugë kundër asaj që ajo e quajti “dhunë e paligjshme” e administratës Trump.
“Mbrëmë, në cepin ku një agjent i ICE vrau Renee Good, mijëra banorë të Minesotës u mblodhën në errësirën e acartë për të protestuar kundër vrasjes së saj,” shkroi Clinton. “Përballë dhunës së paligjshme të kësaj administrate, solidariteti është përgjigjja. Ata duan ta formësojnë Amerikën sipas mizorisë së tyre. Ne refuzojmë,” shtoi ajo.
Vance mbrojti sërish agjentin, duke theksuar se ai kishte vepruar në vetëmbrojtje.
“Ky avokat bën një dallim absurd mes një agjenti të ICE-së dhe një oficeri policie,” shkroi ai. “Nuk lejohet të ndërpritet një operacion i zbatimit të ligjit, dhe kjo është pikërisht ajo që po bënte kjo grua”, tha ai.
Sipas Vance, në momentin e të shtënave, gruaja “e kishte drejtuar automjetin drejt agjentit dhe kishte shtypur pedalin e gazit”. Ai shtoi se pamje të tjera video tregojnë se ajo e goditi agjentin me makinën e saj ndërsa po përshpejtonte.
“Ky burrë po bënte punën e tij. Ajo u përpoq ta ndalonte. Kur ai iu afrua makinës së saj, ajo tentoi ta godiste,” shkroi Vance.
