Një vajze 17-vjeçare humbi jetën dhe tre persona të tjerë u plagosën në një sulm me shpatë në një shkollë të mesme në Fagersta, në Suedinë qendrore, të premten e 21 gushtit.
Sipas policisë, në sulmin në shkollën Brinell u plagosën rëndë dy djem, 12 dhe 17 vjeç, ndërsa një person tjetër pësoi lëndime të lehta. Një 18-vjeçar është arrestuar në lidhje me ngjarjen, ndërsa autoritetet po e hetojnë rastin si vrasje dhe tentativë vrasjeje.
Kryeministri suedez Ulf Kristersson dhe liderja e opozitës, Magdalena Andersson, vizituan shkollën të shtunën në mëngjes. Në hyrje të saj janë vendosur lule në nderim të viktimës.
Sulmi ndodhi pak pasi nxënësit ishin rikthyer në shkollë pas pushimeve verore. Policia konfirmoi se përdori armë zjarri pasi mbërriti në vendngjarje, por nuk bëri të ditur nëse i dyshuari ishte qëlluar përpara arrestimit.
Sipas transmetuesit publik suedez, i dyshuari mbante një helmetë, ndërsa mediat lokale raportuan se ai mund të ketë qenë ish-nxënës i shkollës.
Rajoni u shpall në gjendje të jashtëzakonshme të premten, por masa u hoq të shtunën.
