Presidenti Donald Trump urdhëroi një sulm kundër Sirisë. Nga luftanijet në Mesdhe, Pentagoni ka lëshuar 59 raketa “Tomahawk” mbi objekte të qeverisë siriane, si kundërpërgjigje ndaj sulmit me armë kimike në Siri, për të cilin Uashingtoni fajësoi Bashar al Asadin.
Në një fjalim, Trump tha se Asadi u mori jetën njerëzve të pashpresë. Objektivi kryesor i bombardimeve amerikane është një bazë ajrore në Homs.
Rusia e ka dënuar këtë goditje duke thënë se është agresion dhe do të dëmtojë marrdhëniet e Moskës me Uashingtonin. Ka raportime për civilë të vrarë, por ende nuk janë konfirmuar zyrtarisht dëmet.
Kjo është goditja e parë e drejtpërdrejtë që SHBA ndërmarrin kundër qeverisë së Asadit që nga fillimi i luftës civile në Siri, gjashtë vjet më parë.
Për këtë ofensivë ka reaguar edhe televizioni kombëtar sirian, duke i cilësuar sulmet e SHBA-ve, si një akt agresioni.
Kjo lëvizje e SHBA-ve ishte paralajmëruar gjatë ditës së enjte, nga ana e presidentit Donald Trump, në bisedën me disa antarë të Kongresit.
“Kjo nuk duhet të ndodhte. Kjo nuk duhet lejuar të ndodhë”, u shpreh Trump, kur denoncoi atë që ai e quajti “krim skandaloz”, sulmin me armë kimike në Siri.
Ende nuk dihet nëse sulmi amerikan mbi siri do të përshkallëzohet, apo Trump do të mjaftohet vetëm me dërgimin e këtij sinjali ndaj Assad-it.
c.a
