Të paktën katër persona u qëlluan për vdekje dhe tetë të tjerë mbetën të plagosur pasi një person i armatosur hapi zjarr brenda një kishe në shtetin verior të Miçiganit, SHBA.
Autori i ngjarjes, i identifikuar si 40-vjeçari Thomas Jacob Sanford, hyri me automjet në derën e Kishës së Jezu Krishtit dhe Shenjtorëve të Ditëve të Fundit, ndërsa më pas i vuri zjarrin objektit duke hedhur benzinë.
Policia mbërriti menjëherë në vendngjarje dhe e qëlloi për vdekje autorin e krimit. Autoritetet po e hetojnë ngjarjen si një “akt dhune të synuar”, ndërsa shtojnë se motivi mbetet ende i paqartë. Hetuesit po kryejnë një kontroll në pronën e të dyshuarit dhe po shqyrtojnë të dhënat e telefonit të tij celular.
Sulmi në kishën e zonës Grand Blanc, një qytet 100 km në veriperëndim të Detroitit, ndodhi gjatë shërbesës së ditës së diel, ku morën pjesë qindra persona.
Sipas të dhënave të ushtrisë amerikane, autori i sulmit, Sanford ka shërbyer si pjesë e Marinës Amerikane nga viti 2004 deri në vitin 2008, dhe ishte veteran i luftës në Irak.
