Tunizia njoftoi sot mbylljen, për një periudhë 15 ditore të kufirit tokësor me Libinë, pas situatës kaotike të krijuar pas sulmit terrorist ku mbetën të vrarë 12 roja të gardës presidenciale, në qendër të Tunizit.
“Këshilli i sigurisë kombëtare i kryesuar nga kreu i shtetit, Beji Caid Essebsi vendosi mbylljen e kufirit me Libinë për 15 ditë duke nisur nga mesnata e së mërkurës, me shtimin e mbikëqyrjes në kufijtë detare dhe në aeroporte”, sipas një deklarate të lëshuar nga presidenca.
Tunizia vendosi gjithashtu intensifikimin e operacioneve të bllokimit të faqeve të internetit që kanë lidhje me terrorizmin dhe marrjen e masave në mënyrë urgjente përsa i përket personave që vijnë nga vatrat e konfliktit, në kuadër të ligjit antiterrorizëm.
Mijëra tunizianë ndodhen tashmë, referuar autoriteteve, në Irak, në Siri dhe në Libi, në radhët e grupeve ekstremiste siç është organizata e Shtetit Islamik (ISIS) që mori përgjegjësinë e sulmit të djeshëm në Tuniz.
