Zëvendëskryeministri Erjon Braçe është përfshirë ashpër në debatin për fotografitë e heronjve të popullit të vendosura në Bulevardin e Dëshmorëve në kuadër të 75-vjetorit të Çlirimit. Ka pasur disa zëra të cilët kanë shpërthyer në akuza ndaj qeverisë, duke e konsideruar atë si nostalgjike të periudhës socialiste në Shqipëri dhe duke sulmuar dëshmorët e kombit. Argumentet e tyre ishin se me anë të fotove të tyre, është duke u promovuar periudha diktatoriale që Shqipëria ka kaluar, duke iu referuar sistemit totalitar 45-vjeçar të Enver Hoxhës.
Por një zë aktiv në përgjigje të tyre ka qenë Braçe, i cili ka shpjeguar se fotot e dëshmorëve nuk kanë lidhje me diktaturën e aplikuar pas Luftës Antifashiste Nacional Çlirimtare. Ditën e djeshme zëvendëskryeministri, nga Elbasani kërkoi t’i jepet fund kësaj lufte ndaj njerëzve që dhanë jetën për kombin.
“Heronj nuk i shpalla unë, nuk i shpalli as qeveria. Heronjtë i shpalli lufta. Një gjë ju kërkoj që ta ndalim këtu luftën kundër heronjve të kombit. Kush sulmon heronjtë e kombit, sulmon vetë kombin, sulmon historinë e tij, turp përjetë dhe atyre që sot e kësaj dite nuk heqin dorë nga mallkimi, fyerja, sharja dhe urrejtja për ata që dhanë jetën për lirinë e kombit”, ka deklaruar dje Braçe.
Duke iu përgjigjur gazetarëve, Braçe pranoi se Shqipëria sot nuk është vërtetë ajo që dëshmorët e luftës projektuan. Mazhorancës i njeh përgjegjësi kryesore për këtë gjendje, por nga ana tjetër, Braçe kërkon ti njihet edhe një meritë.
“Ajo është përgjegjësja kryesore për atë që ndodh në këtë vend nga momenti kur është në pushtet, por duhet t’i njihni kësaj mazhorance meritën e madhe të pastrimit të një sistemi kriminal drejtësie”, tha zëvendëskryeministri.
Kryesisht zërat kundër kanë qenë zëra nga radhët e opozitës të cilët më shumë se sa të revoltuar nga fotot, kanë përfituar nga rasti për të sulmuar qeverinë. Po ashtu zëra të tjerë kritik ndaj kremtimeve që po bëhen për 75-vjetorin e Çlirimit, kanë qenë edhe persona që vinë nga familje ose kanë qenë vetë të persekutuar gjatë periudhë së komunizmit.
/a.r
