PD është hedhur në sulm ndaj Sandër Lleshit, akoma pa e marrë zyrtarisht detyrën si ministër i brendshëm
Fillimisht ishte ish-presidenti Nishani, i cili u hodh në sulm ndaj gjeneralit të vlerësuar nga gjermanët, por siç duket inati i ish-presidentit është i vjetër.
Ai e akuzoi ministrin e propozuar nga Rama si ekstremist politik.
“Personi konkret është një ekstremist politik. Nuk është më gjeneral. Kur ka pasur uniformë u angazhua në aktivitet politik të njëanshëm. Nuk ka fare rëndësi kush bëhet ministër, pasi ministrat rezultojnë të lidhur me krimin. Të dy ish ministrat kanë përfituar nga aktivitetet kriminale. Lleshi ka fyer Kushtetutën duke qenë me uniformë”, tha Nishani.
Por sot sulmeve të Nishanit iu bashkua edhe Berisha. ish-kryeministri zgjodhi qytetarin dixhital për të sulmuar pasardhësin e Xhafajt.
Ish-Kryeministrit Sali Berisha, në një postim në Facebook, ka publikuar informacione të dërguara nga një “punonjës” dixhital i Kryeministrisë.
Berisha shkruan se Lleshi merrte dy rroga shtetërore, një nga ministria e Mbrojtjes dhe tjetra nga Kryeministria.
Javanews sjell momentet kur Gjenerali Sandër Lleshi fitonte betejën me ish-Presidentin dhe ministrinë e mbrotjes në kohën e PD
Karriera ushtarake e gjeneralit u ndërpre në vitin 2013 kur me kërkesë të ministrit të Mbrojtjes të kohës, Arben Imami, Presidenti Nishani e shkarkoi nga detyra.
Këtë vendim, Lleshi e ankimoi në Gjykatë ku edhe fitoi të drejtën e dëmshpërblimit.
Lleshi kishte ngritur padi ndaj presidentit dhe Ministrisë së Mbrojtjes, duke kërkuar pavlefshmërinë e lirimit të tij nga detyra në Maj të vitit 2013.
Pas katër vitesh “luftë” në gjykata, Lleshi ka mundur të marrë të drejtën e tij.
Gjykata Administrative e Apelit, pranoi padinë e gjeneralit Lleshi, duke vendosur kthimin në detyrën e zv/Shefit të Shtabit të Përgjithshëm të Forcave të Armatosura, apo në një tjetër detyrë në përputhje me gradën që mban.
Po ashtu, gjykata detyron palën e paditur Ministria e Mbrojtjes, që t’i paguajë paditësit Sandër Lleshi, pagën nga data 29.05.2013, deri në datën e sistemimit të paditësit në detyrën e Zv/Shefit të Shtabit të Përgjithshëm të Forcave të Armatosura.
Lleshi ka mbajtur që prej vitit 2013, kur Rama erdhi në pushtet, detyrën e këshilltarit të Kryeministrit për çështjet e Sigurisë.
Javanews/a.ç
