Pesë persona mbetën të plagosur, mes tyre një grua në gjendje kritike dhe e intubuar, pas tre sulmeve të koordinuara me bombola gazi që synuan banesat e tre zyrtarëve të partisë në pushtet në Greqi, Demokracia e Re (ND), në Selanik.
Sipas autoriteteve sulmet u regjistruan njëra pas tjetrës në orët e para të mëngjesit, vetëm në 20 minuta, dhe dyshohet se autorët lëvizin me motoçikleta. Çështja është marrë në hetim nga Shërbimi i Antiterrorit, i cili po shqyrton mundësinë që bëhet fjalë për një plan të organizuar, sipas raportimeve të mediave greke.
Sulmi më i rëndë u regjistrua në zonën e njohur si Harilaou, rreth orës 04:35, ku një zjarr që u shkaktua prej një bombole gazi u përhap e shpejtësi duke përfshirë edhe dy automjete dhe dy motoçikleta. Një prej automjeteve i përkiste politikanes Aphrodite Nestora, e cila është edhe avokate e njohur në Sekanik dhe drejtuese e lartë në partinë në pushtet.
Si pasojë e zjarrit nëna 70-vjeçare e Nestorës pësoi djegie të rënda në të gjithë trupin dhe po trajtohet e intubuar në Njësinë e Kujdesit Intensiv të spitalit “Ippokrateio”. Vetë Aphrodite Nestora pësoi djegie të lehta në gjymtyrë, ndërsa babai i saj dhe dy banorë të tjerë të pallatit u dërguan në spital për shkak të problemeve me frymëmarrjen të shkaktuara nga tymi.
Ndërsa vetëm pak minuta më herët rreth orës 04:23, një tjetër sulm u regjistrua në zonën e njohur si Tumba, ku persona ende të paidentifikuar vendosën një bombol gazi në hyrjen e pallatit ku banon sih-deouteti Savvas Anastasiades. Shpërthimi shkaktoi dëmtime në hyrjen e godinës, duke thyer xhamat dhe dëmtuar fasadën, por fatmirësisht pa shkaktuar të lënduar.
Ndërsa sulmi i parë u regjistrua në orën 04:18, në Pylaia, ku një bombol gazi u vendos dhe u aktivizua pranë një godine që në të kaluarën ishte banesë e kryetarit të Komitetit Drejtues të Demokracisë së Re në Selanik, Zisis Ioakimoviç. Në këtë rast nuk u raportuan dëme materiale apo të lënduar.
