Së paku 23 vetë, shumica prej tyre nga grupi kryengritës sirian Ahrar al-Sham, janë vrarë nga një sulmues vetëvrasës në qytetin Alepo, ka njoftuar një grup monitorues.
Grupi Observatori Sirian për të drejtat e njeriut, me seli në Londër, tha se 19 luftëtarë të këtij grupi islamik, përfshirë katër komandantë dhe katër civilë, ishin vrarë dje në eksplodimin në lagjen Sukari.
Me këtë sulm vetëvrasës u godit një pikë kontrolli në hyrje të një kompleksi të sigurisë, që i takonte grupit al-Sham. Disa persona që mbaheshin të burgosur aty, mendohet se po ashtu, janë vrarë nga eksplodimi, që i ka shkatërruar tri ndërtesa, ka njoftuar observatori. Është e paqartë se kush e ka kryer sulmin. Grupi al-Sham aktualisht është goditur nga një varg sulmesh. Observatori sirian për të drejtat e njeriut tha se një komandant i al-Shamit dhe 11 anëtarë të familjes së tij, po ashtu, ishin vrarë dje nga një sulm ajror i Rusisë, përfshirë edhe tre fëmijë.
Grupi al-Sham është anëtar udhëheqës i aleancës, Ushtria e Pushtimit, e cila e ka kontrollin në provincën Idlib, së bashku me grupin al-Nusra Front, i ndërlidhur me al-Kaidën.
