Dy vizitorë dhe dy roje sigurie janë vrarë në një sulm me armë pranë sinagogës më të vjetër të Afrikës, në ishullin tunizian të Djerba-s. Sulmi ndodhi gjatë një pelegrinazhi vjetor në ishull, i cili mbledh vizitorë hebrenj nga Evropa dhe Izraeli.
Një roje thuhet se vrau partnerin e tij përpara se të hapte zjarr ndaj vizitorëve dhe forcave të sigurisë pranë sinagogës përpara se të vritej vetë.
Ende nuk dihet motivimi i sulmit. Një nga vizitorët e vrarë ishte një 42-vjeçar nga Franca dhe një tjetër ishte një 30-vjeçar tunizian. Katër vizitorë të tjerë dhe pesë anëtarë të forcave të sigurisë u plagosën.
Më shumë se 5,000 hebrenj morën pjesë në pelegrinazhin e vitit 2022 në Djerba, raportoi agjencia e lajmeve AFP, duke cituar organizatorët lokalë.
Rreth 1,800 hebrenj jetojnë ende në Tunizi, shumica në Djerba, nga 100,000 që jetonin atje në mesin e shekullit të 20-të.
Nuk është hera e parë që sinagoga 2500-vjeçare, që besohet të jetë më e vjetra në Afrikë, vihet në shënjestër. Në vitin 2002, një sulm me bombë, të cilin e morën përgjegjësinë militantët islamikë të Al-Kaedës, vrau më shumë se 20 njerëz në ishull.
Pelegrinazhi vjetor në Djerba, rreth 500 km nga kryeqyteti, Tunis, ka pasur siguri të forta që nga bombardimi.
Tunizia është një vend me shumicë myslimane, por Djerba është shtëpia e qindra hebrenjve.
/a.r
