Ekipet e shpëtimit në Krivyi Rih të Ukrainës janë ende duke kërkuar për viktima në rrënojat e një qendre tregtare, pasi një sulm i dyfishtë rus të premten vrau të paktën 16 persona dhe plagosi më shumë se 130. Guvernatori
i rajonit të Dnipropetrovskit, ku ndodhet qyteti, vendlindja e Presidentit ukrainas Volodymyr Zelensky, tha se 22 fëmijë ishin midis të plagosurve në sulmin që ndodhi në mes të ditës.
“Janë 29 persona në gjendje të rëndë, përfshirë pesë fëmijë”, tha Hanza, duke postuar një foto në mediat sociale që tregon tym të zi që ngrihet nga një ndërtesë e madhe.
Në një përditësim të mëvonshëm të shtunën në mëngjes, Hanza tha se nëntë persona rezultojnë të zhdukur , përfshirë dy fëmijë, dhe ekipet e shpëtimit ende po i kërkojnë ata në rrënojat e qendrës tregtare.
Zelensky e quajti sulmin “absolutisht cinik dhe të neveritshëm”, duke shpjeguar se një dron i dytë rus goditi qendrën tregtare gjysmë ore pas të parit, duke e denoncuar atë si një përpjekje të qëllimshme për të synuar punonjësit e shpëtimit.
“Sulme të tilla nuk janë gjë tjetër veçse akte terroriste”, theksoi ai në Telegram, duke i bërë thirrje bashkësisë ndërkombëtare ta mbajë Rusinë përgjegjëse dhe duke premtuar: “Ne patjetër do të përgjigjemi.”
Në një sulm të veçantë dje, të paktën katër persona, përfshirë tre fëmijë, u vranë dhe një grua u plagos në një sulm me dron rus në rajonin jugor të Mykolaiv, raportuan mediat shtetërore ukrainase.
