Në kulm të garës për kryetar të Forumit Rinor të Partisë Demokratike janë ashpërsuar ato që në boks quhen “goditje të ulta” për Belind Këlliçin. Ky i fundit është i lidhur me vajzën e dy prindërve socialistë, Artan Shkreli e Ledi Shamku dhe, për këtë arsye, një faqe anonime ka krijuar një fotomontazh, duke aluduar se përmes Këlliçit Edi Rama do të marrë nën kontroll edhe FRPD.
Këlliçi ka reaguar menjëherë, shkruan civitas.al:
“Miq. Po lexoni këto ditë muhabete kollovarësh? Mos u trishtoni! Vijnë nga jashtë nesh!
PD nuk merret me biografi. Me to merrej Fronti Demokratik i Nexhmije Hoxhës, të cilit mesa duket i ka prishur planet gara jonë dhe po fut fuqishëm hundët. Këta tipa, pa lidhje me FRPD dhe PD, kanë ditë që po ju fryjnë në vesh se “dhëndrri i rilindjes po ju merr Forumin”
Së pari, unë jam Belind Këlliçi dhe votohem për këtë që jam. E kam krenari që vij nga e djathta tradicionale që nga të parët e mi, gjyshi me të vëllanë, me kontribute në Pavarësinë dhe ngritjen e shtetit shqiptar, në të djathtën dhe vetëm të djathtën shqiptare. Jam biri i dy prindërve të mrekullueshëm, demokratë të orëve të para dhe vetë, që fëmijë, jam militant i angazhuar fort në Partinë Demokratike, të cilës prej 6 vitesh i kam kushtuar gjithçka.
Së dyti, ka kohë që jam i lidhur me një vajzë të mrekullueshme. Është e vërtetë që është e bija e atyre prindërve që shkruan Fronti Demokratik. Me vajzën na lidh ndjenja, siç ndodh me shumicën dërrmuese prej nesh. Kush është lidhur me partnerë për përfitim a interes ndoshta nuk e kupton ç’do të thotë të ndash ndjenjat me dikë, edhe pse mund të jetë nga “familje e prekur”. Unë që kam drejtuar Departamentin e Ish-të Përndjekurve në PD kam dëgjuar plot raste rrënqethëse kur njëri partner e ka pësuar se tjetri s’kishte “partishmëri”. Por kjo ka ndodhur dikur. Ka ndodhur në kohën dhe partinë e atyre që përmbysëm para 25 vitesh.
Kush ka hyrë si kollovar në shoqëri, politikë, intimitet beson se “krushku” që të ka futur e të mban të lëviz edhe fijet e të drejton. Të përdor edhe si mashë për të kapur gështenjat që s’i zë dot. Ky sorollop Fronti s’e ka për gjë të tradhëtojë si kauzat ashtu edhe dashuritë.
Unë nuk kam hyrë në këtë garë për të përfaqësuar këtë llumnajë. Jemi ndarë që në ’90-ën ne demokratët prej luftës së klasave, rrëmimeve në biografi, intrigave dhe shantazheve të bodrumeve. Unë kam hyrë në një garë ku kërkoj votat e çdo demokrati të ri që në rradhë të parë ka respekt dhe vlerësim për veten, që beson tek vlerat e individit, që kërkon të udhëhiqet nga një drejtues me integritet e dinjitet, që kërkon një politikë të re dhe një FRPD të fuqishëm .
Për “Frontin” që përpiqet të gjejë fije e lidhje, kam një barcoletë, nga koha e tyre:
Takon një xhaxha në tren një tip dhe e pyet “nga je”
– Mos ma merr për mburrje – i thotë ky – po kunatin e madh e kam në Ministri të Brendëshme, burri i motrës së dytë më punon në Sigurim, burri i motrës së tretë..
– Or bir, unë të pyes kush të *** tët’ëmë e jo tët motër!”
Civitas.al
