Stuhia e erës që përfshiu Lushnjën la pa energji elektrike 10 fshatra, rrëzoi dhe shkuli pemët nga toka, disa makina pësuan dëme materiale, ndërsa pati thyerje të xhamash të objekteve dhe sende që binin nga lartësia.
Shërbimi zjarrfikës pohon se gjatë 24 orëve të fundit kishin një aktivitet të shtuar të punës. Deri në orën 23:30 të ditës së djeshme u punua për largimin e ujit në 7 objekte të raportuara.
Situata e kushteve atmosferike gjatë të hënës paraqitet më e qetë, ndërkohë që po punohet për kthimin e energjisë në zonat ku u ndërpre. Nuk ka toka të përmbytura dhe hidrovoret janë të gjithë në punë, ndërsa grupet e punës janë në terren për largimin e pemëve të rrëzuara nga era.
