Mund të duket shaka por është bërë një studim. Një ekip shkencëtarësh nga Universiteti “Cornell” thotë se, në rast të një apokalipsi të zombi-ve, duhet të ikim në male.
Rreziku nga një virus i cili do t’i “ngjallte” të vdekurit, duke i bërë ata makina të vërteta vrastare, ka qenë i pranishëm në shumë libra dhe filma deri më tani, por ekipi i shkencëtarëve të lartpërmendur kanë dalë me një studim se çka të bëhet, po të ndodhë me të vërtetë një gjë e tillë.
Shkencëtarët ishin nisur nga supozimi se zombit e rinj do të krijoheshin kur zombit ekzistues t’i kafshonin njerëzit e painfektuar, duke e përhapur me të shpejtë sëmundjen në popullsi.
“Në rast të një epidemie të tillë, pritet që të preken të gjitha zonat në të njëjtën kohë dhe, disa muaj më pas, do të mbeteshin vetëm disa zona të vogla, të paprekura”, thotë Alex Alemi, pjesëmarrës në studim.
Ekipi i shkencëtarëve kanë konstatuar se, derisa qytetet e mëdha me gjasë do të infektoheshin shpejt, zonat rurale do të mbesnin relativisht të paprekura për një kohë të caktuar. Bjeshkët dhe zonat e tjera, ku zombit do ta kishin vështirë të shkonin, do të ishin më të sigurtat për njerëzit e mbijetuar. express
