Janë kaq shumë gjëra të cilat mund t’i bëjnë njerëzit e mirë dhe punëtorë të pushohen nga puna. Shpeshherë gabimet e vogla mbajnë pas tyre pasoja të mëdha.
Një studim që është bërë së fundmi nga “ePolicy Institute” ka vëzhguar më shumë se 300 kompani dhe ka zbuluar se një e treta e kompanive i kanë pushuar punonjësit e tyre si pasojë e keqpërdorimit të teknologjisë.
Kompanitë janë shumë të shqetësuara për abuzimin e punonjësve me teknologjinë. Ndër arsyet keqpërdorimit të teknologjisë janë dhe postimet nëpër rrjete sociale. Këtu mund të gjeni dhe disa nga gabimet më të zakonshme që punonjësit bëjnë.
1. Pritshmëri të larta por rezultate të dobëta
Kur filloni një punë të re, për të cilën nuk jeni të kualifikuar mjaftueshëm nga gëzimi i madh, shpeshherë bëni premtime dhe merrni përgjegjësi të shumta të cilat nuk i keni menduar gjatë dhe me kalimin e kohës kur duhet të mbani përgjegjësi për gjithçka thatë e premtuat më parë, ndodh t’ju shembet bota nënkëmbë.
Mos u çuditni nëse pushoheni papritur nga puna, duhet të ishit menduar gjatë përpara se të merrni përsipër më shumë nga sa mundeni.
2. Negativiteti
Kur punësoheni diku ajo çka pritet nga ju është që ta bëni më te thjeshtë jetën e punëdhënësit tuaj dhe të të gjithë skuadrës me të cilën punoni.
Njerëzit të cilët shpërndajnë vazhdimisht negativitet përreth departamentit apo e bëjnë jetën e punëdhënësit më të vështirë janë të parët që hiqen nga puna.
3. Mungesa e sjelljes së mirë
Edhe pse shpeshherë ka disa persona të cilët të bëjnë të bërtasësh apo edhe të humbasësh toruan, përpiquni t’i merrni gjërat shtruar e të qetësoheni.
Mbani një qëndrim neutral në orarin tuaj të punës pasi humbja e kontrollit do t’ju dëmtonte ju mbi të gjitha si dhe është një arsye për tu hequr nga puna.
4. Keqpërdorimi i burimeve të kompanisë
Keqpërdorimi i burimeve të kompanisë është një shkelje serioze, edhe pse shpeshherë mund t’ju duket si diçka e vogël marrja e një kutie letër apo përdorimi i telefonit për arsye personale, kjo është një shkelje e rëndë.
Të gjitha burimet e kompanisë duhet të shfrytëzohen vetëm në të mirë të saj.
5. Të flasësh në emër të kompanisë
Kur jeni përfaqësues i një kompanie të madhe është e rëndësishme të tregoheni të kujdesshëm në shprehjen e opinioneve personale pasi shpeshherë ato mund të identifikohen lehtësisht me opinionet e kompanisë ku ju bëni pjesë.
Duhet të kuptoni se është e vështirë të ndahet në mendjen e njerëzve nëse po flisni ju apo përfaqësuesi i kompanisë. Kjo, padyshim është një arsye e fortë për tu pushuar nga puna. /b.d
