Të qenit fizikisht aktiv dhe në formë gjatë adoleshencës mund të ketë ndikim pozitiv në shëndetin mendor edhe dekada më vonë. Ky është përfundimi i një studimi australian, sipas të cilit të rinjtë me gjendje më të mirë aerobike kanë rrezik më të ulët për të zhvilluar depresion në moshë madhore.
Studiuesit analizuan më shumë se 1 000 persona, të përfshirë në një studim kombëtar që nisi në vitin 1985, dhe i ndoqën për 34 vjet.
Forma fizike u mat që në fëmijëri dhe adoleshencë përmes disa testeve, përfshirë vrapimin në një distancë prej 1.6 kilometrash, kërcimin së gjati nga vendi, si dhe, te një grup më i vogël, testet me biçikletë dhe matjen e forcës së shtrëngimit të dorës.
Koha mesatare për përfundimin e vrapimit ishte 8 minuta e 27 sekonda. Megjithatë, ata që përfundonin distancën rreth 1 minutë e 15 sekonda më shpejt se mesatarja kishin një rrezik relativisht 15% më të ulët për të zhvilluar depresion në moshë madhore.
Efekti ishte më i theksuar gjatë 5 deri në 10 viteve pas testimeve, por lidhja me një rrezik më të ulët për depresion vazhdoi të vërehej përgjatë gjithë periudhës 34-vjeçare të ndjekjes.
Studiuesit vunë re gjithashtu se efekti mbrojtës ishte më i fortë te femrat sesa te meshkujt.
Pavarësisht këtyre të dhënave, ekspertët theksojnë se studimi nuk provon se mungesa e aktivitetit fizik shkakton depresion. Depresioni lidhet me shumë faktorë, ndërsa forma fizike mund të jetë një element i rëndësishëm në mbrojtjen e shëndetit mendor në afatgjatë.
