Kriza ekonomike që nisi më 2008 mund të matet me shumë zëra, si prodhimi i përgjithshëm i një vendi, rritja e papunësisë, konsumi i mallrave e shërbimeve, e të tjera. Veç tyre, edhe me rritjen e numrit të të vdekurve nga kanceri. Në këtë këndvështrim, mund të thuhet se kriza ka “kushtuar” vdekjen e 260 mijë personave më tepër në vendet e OECD (Organizata për Zhvillimin dhe Bashkëpunimin Ekonomik) dhe rreth 160 mijë në vendet e Bashkimit Evropian. Shifrat janë për periudhën 2008-2010.
Këtë e thotë studimi i publikuar nga The Lancet, botuar më pas nga gazetat të më mëdha botërore, i cili, duke përdorur të dhënat e Bankës Botërore dhe të Organizatës Botërore të Shëndetësisë në më tepër se 70 vende për harkun kohor 1990-2010, ka analizuar impaktin e papunësisë dhe të reduktimit të shpenzimeve shëndetësore në vdekshmërinë nga patologjitë onkologjike.
Gjatë të gjithë harkut kohor të analizuar, është vënë re lidhje direkt midis rritjes së papunësisë dhe rritjes së vdekshmërisë nga të gjitha llojet e tumoreve: pulmonar, zorrën e trashë, gji, prostatë. Me rritjen e të parës, rritej dhe e dyta. E thënë me shifra, një rritje 1% e papunësisë korrespondon me rritje të vdekshmërisë nga kanceri të barabartë me 0,37 për çdo 100 mijë persona.
D.I.
