Milena Beran, studente e Gjuhës dhe Letërsisë Shqipe, në Beograd, shpreh keqardhje për konfliktet midis shqiptarëve e serbëve dhe për marrëdhëniet aktuale midis Kosovës e Serbisë. Milena, e cila po merr pjesë në Seminarin Ndërkombëtar për Gjuhën, letërsinë dhe Kulturën Shqiptare, që po mbahet në Prishtinë, shpreson se marrëdhëniet midis Kosovës e Serbisë do të normalizohen dhe të rinjtë e të dyja vendeve do të kenë bashkëpunim më të mirë
“Më vjen shumë keq për konfliktet që kishim në të kaluarën. Më vjen shumë keq edhe për gjërat që po ndodhin sot, të cilat nuk janë të mira, dhe shpresoj që do të kemi një mundësi që në të ardhmen të bëhemi një shoqëri e mirë në Ballkan, pa konflikte, pa paragjykime, sepse mendoj që ne mund të bëhemi shokë dhe shoqe, sepse jam mike me shumë njerëz këtu.
Mendoj se nuk është problemi me njerëzit, mendoj se politika dhe politikanët i kanë bërë problemet shumë të mëdha, por shpresoj që në të ardhmen do të kemi më shumë bashkëpunim midis rinisë shqiptare dhe serbe. Është e nevojshme, është diçka që duhet bërë”, ka thënë ajo, në një intervistë për Radion Evropa e Lirë. Studentja serbe Milena Beran pohon se në rrrethin e saj ende ka paragjykime për shqipen dhe shqiptarët
“Kur unë fillova ta studioja gjuhën shqipe, nëna ime ishte e kënaqur. Ajo nuk kishte paragjykime. E kuptoi që unë e doja gjuhën shqipe dhe duhet të mësoja më shumë dhe duhet të lexoja. Por, vëllai im, i cili është më i vogël se unë, nuk e kuptonte pse doja ta studioja pikërisht gjuhën shqipe.
Por, tani që po e filloj vitin e katërt, në tetor, vëllai im është shumë krenar me mua dhe gjithmonë u thotë shokëve të tij ‘motra ime studion gjuhën shqipe dhe është shumë e guximshme’. Situata nuk është sikurse kemi dëgjuar në televizion ose diku tjetër. Mendoj se me mua, me eksperiencën time, edhe familja ime po ndryshon, po i ndryshojnë pikëpamjet. Për shembull, vitin e kaluar i kam bërë pushimet me familjen time në Ulqin dhe ishte shumë mirë. Nëna ime gëzohej. Nuk kishim asnjë problem. Tani po përpiqemi të shkojmë në Shqipëri, t’i bëjmë pushimet atje, pse jo?” është shprehur Beran.
Albanologia e ardhshme serbe, e cila merr pjesë për herë të dytë në Seminarin Ndërkombëtar për Gjuhën, letërsinë dhe Kulturën Shqiptare që po mbahet në Prishtinë, ka thënë se, krahas gjuhës, në fokus të interesimit të saj janë kultura dhe tradita shqiptare.
“Tani interesohem shumë për kulturën dhe traditën shqiptare dhe mendoj se është një gjë interesante për mua”, ka thënë ajo.
