Sot, te paktën nëse e realizojnë sipas parashikimit, studentët e gjithë fakulteteve do të mblidhen të vendosin për fatin e protestës së tyre. Nga deklarata që kanë nxjerrë pak minuta më parë, duket se patetizmin po mbyt realisht imazhin e tyre. Theksimi i vazhdueshëm për mosndikimin politik tregon kompleksin e madh se gjithsesi politika ka gisht në të dhe më shumë akoma se çdo protestë e ka një arsye politike. Por më e dhimbshmja është mënyra sesi u drejtohen njerëzve: Në djall shkofshi nëse nuk na besoni! Nëse publiku nuk i beson është faji i tyre dhe jo i njerëzve, që deri më tani i kanë parë si shpresë.
Për hir të së vërtetës kushtet e studentëve janë katastrofale dhe propaganda e përgjithshme qeveritare megjithëse flet në kohën e ardhshme është ende shumë larg realizimit të kushteve të tyre bazike. Këto dhe arsye të tjera që lidhen me fuqinë e diplomës së tyre dhe mundësitë e punësimit duhet të jetë tema, që po bjerret pak e nga pak.
Gjithsesi, vetëm studentët e Ekonomikut të cilët prej pak ditësh janë ngujuar brenda fakultetit kanë bërë sot një komunikim për mediat. Studentët e kanë gdhirë tërë natën dhe se e kanë pasur të vështirë për shkak të temperaturave të ulëta. Gjatë natës kanë qëndruar 50 studentë brenda fakultetit.
“Një herë të vetme mos përbaltni dëshirat tona për këtë vend. Nëse mendoni se jemi partiakë, në djall shkofshi dhe ju me to. Gjithmonë kemi besuar se arsimi është thelbi i lirisë së mendimit. Tani janari duhet të na gjente më me dinjitet, e prapë nuk jemi të përfaqësuar. Sot jemi në shkollë, në ambjente të ftohta të dimër e të ngrohta në verë. As kushtet minimale nuk kemi. Qëllimi ynë nuk ishte ndërrimi i partive, por plotësimi i të drejtave legjitime. Ne u themi këtë: në shkollë jemi 100 vetë, por mbi kokë kemi si aureolë shumicën që duan të studiojnë. Të gjithë duam mësim,” thuhej në deklaratën që lexoi një prej studenteve dhe u citua nga NEWS24.
Lidhur me vendimin se çfarë do të bëjnë më vonë, studentët thanë që do bëjnë një mbledhje në orën 18:00 për të vendosur se me mënyrën si do të vijohet, por kjo mbetet per tu pare. (Javanews)
