Studentët e Universiteti të Tiranës dhe të Politeknikut po protestojnë përpara Ministrisë së Arsimit, për të kërkuar anulimin e tarifës për provimet e prapambetura.
Ata marshuan këtë të mërkurë drejt Ministrisë së Arsimit ku nuk munguan as format e ndryshme të kundërshtisë si hedhja e vezëve dhe e lapsave drejt godinës së MAS.
Në mbështetje të studentëve kanë dalë dhe deputetët e opozitës.
“Jam student që nuk frikësohem/ Rezistenca nuk ndalohet” thërrasin studentët me megafon duke shtuar se nuk do largohen pa u takuar me ministren dhe kjo e fundit të anulojë vendimin. Studentët kanë bllokuar edhe rrugën përpara ministrisë së Arsimit.
“Duhet të paguajmë 650 lekë për çdo kredit të prapambetur. Është hequr mundësia për të paguar tarifën vjetore me këste”, kanë deklaruar studentët.
Sipas tyre, tarifa është e lartë dhe nuk mund të paguhet vetëm me një këst.
Në një moment përfaqësuesit e ministrisë, me në krye zv/ministrin e Arsimit, Besa Shahini dolën dhe i kërkuan disa studentëve të futen brenda ministrisë dhe të përgatisin një listë me kërkesat e tyre.
Por kjo u refuzua nga studentët duke i kërkuar që ministrja të dalë jashtë të flasë me ta.
Nga ana e saj, Nikolla tha se është e gatshme të negociojë duke pritur një përfaqësi të studentëve por nuk mund ta bëjë këtë gjë në rrugë.
a.çupaj
