Një shpërthim i papritur i encefalitit akut nekrotizues (ANE) është raportuar nga një kolegj mjekësor në Kanpur. Mbi 30 studentë të mjekësisë janë me temperaturë të lartë. Sëmundja e rrallë ka prekur studentët e kolegjit mjekësor GSVM. Midis tyre, shtatë kishin rezultuar pozitivë për infeksionin.
Sipas zëdhënësit të kolegjit mjekësor, Dr. Ganesh Shankar, përhapja e sëmundjes në kampus mund të ketë qenë për shkak të derrave dhe kushteve johigjienike që ata shkaktuan.
Sipas burimeve zyrtare, rasti i parë është raportuar në fillim të kësaj jave kur një studente e vitit të tretë nga Barabanki ka shkuar në spital me temperaturë të lartë dhe dhimbje të forta koke. Studentja u konfirmua se vuante nga sëmundja të martën.
Mësohet se ajo ka rënë në gjendje kome. Zëvendësdrejtoresha e kolegjit Dr Richa Giri informoi se testet mjekësore të vajzës treguan se ajo ishte e infektuar me ANE që ishte përhapur në trurin e saj.
Sipas një mjeku, pesë studentë të mjekësisë të infektuar me ANE janë shtruar në spital të izoluar dhe dy prej tyre janë në ventilator. Pas ekzaminimit të studentëve në konviktin e djemve dhe vajzave, mjekët gjetën gjashtë studentë të tjerë që shfaqnin simptoma të ngjashme. Prej tyre, tre ishin në vitin e tretë dhe një në vitin e fundit. Pesë prej studentëve janë dërguar me urgjencë në spital.
Shpërthimi i papritur i sëmundjes ka pushtuar kolegjin nga frika. Rreth 20 derra janë gjetur të ngordhur rreth kampusit brenda vetëm katër ditëve, thanë burimet. Të gjithë ata janë varrosur në kampus.
Sipas Dr Alok Varma, një neurolog që shërben në kolegj, ANE është një sëmundje e rrallë. Skanimi MRI i studentëve tregoi mpiksje gjaku dhe ënjtje në tru. Ekzaminimi mjekësor gjeti edhe disa viruse të panjohura në trupin e tyre.
Duke pasur parasysh seriozitetin e gjendjes, administrata e kolegjit ka anuluar provimet pasi studentët janë të papërshtatshëm fizikisht dhe emocionalisht për provimet.
ANE është një sëmundje e karakterizuar nga infeksione të frymëmarrjes ose gastrointestinale dhe temperaturë të lartë. Simptomat e infeksionit viral pasohen nga kriza, shqetësime të vetëdijes që mund të përparojnë me shpejtësi në koma, probleme me mëlçinë dhe komplikime të tjera neurologjike. Sëmundja shkaktohet si nga faktorë mjedisorë ashtu edhe nga faktorë gjenetikë.
/a.r
