Studentët e Mjekësisë vijojnë protestat e tyre kundër vendimit të qeverisë për të qëndruar në Shqipëri pas studimeve. Edhe këtë të hënë ata kanë bojkotuar mësimin. Prej një jave studentët nuk janë ulur në auditore.
Protesta e kësaj të hëne nisi në Universitetin e Mjekësisë. Më pas, studentët marshuan drejt Ministrisë së Arsimit. Me brohorima kërkuan që të pezullohet ligji. Po ashtu në shenjë simbolike vendosën tek dera e ministrisë një tufë me lule duke ‘shpallur vdekjen e saj’.
“Nuk jemi mjete, jemi njerëz, jemi studentë, jemi mjekët e ardhshëm, jemi fëmijët e këtij populli, jemi fëmijët për të cilët ky popull dhe ne paguajmë. Jemi fëmijët të cilëve prindërit paguajnë dhe mbajnë kostot në xhep, por mesa duket ky arsyetim ka vdekur dhe kjo ministri e ka shpallur vdekjen e saj”, tha një studente.
“Përpara një jave Ministria e Arsimit është shpallur në rrjetet sociale si e vdekur. Ne mendojmë që kjo dëshmon mungesën totale të seriozitetit të institucioneve tona. Jemi përballë një ministrie karikaturë, përballë një shteti karikaturë që ka ndërtuar një ligj karikaturë me idenë që do të zgjidhë çështjen e largimit të bluzave të bardha. Kjo nuk zgjidhet kështu. Kjo zgjidhet duke u ulur, duke u përfshirë e gjithë shoqëria. Në këtë sens ministria është e vdekur për ne dhe është e vdekur për qytetarët, prandaj ne kemi zgjedhur t’i sjellim lule”, tha një tjetër student.
Një nga kërkesat e tyre është një dialog mes tyre dhe Universitetit të Mjekësisë, Ministrisë së Arsimit e Ministrisë së Shëndetësisë. Megjithatë deri më tani nuk është bërë asnjë takim.
Studentët u shprehën se do të vijojnë me bojkotin.
“Ne ato lekë nuk i kemi. Nuk kemi milionat që ata kërkojnë. Me këto lekë nuk mund të paguajmë rrjepjen apo gjakun që duan të pinë ata”, u shpreh një studente./f.s
E kuptoj te drejten e tyre per te protestuar, pavarsisht qellimit. Por nje gje nuk e kuptoj, nderkohe qe kerkon te mos punosh asnje dite ne vendin tend, tund flamurin kombetar ne protest! Neveri e peshtirosje nga kjo idotesi e pafytyresi!