Në strategjinë që po harton qeveria për strehimin social për 10 vitet e ardhshme parashikohet një ndryshim tërësor i sistemit të deritanishëm përmes vënies në dispozicion të kategorive në vështirësi banesa sociale me qira, me kosto të ulët dhe truall për infrastrukturë në ato që konsiderohen si prona shtetërore.
Në këtë strategji parashikohet që deri në qershor të vitit të ardhshëm të ndryshojë edhe ligji për programet sociale të strehimit.
Ndryshimet më të rëndësishme parashikohen në rishikimi i funksionimit të strukturave të strehimit në njësitë e qeverisjes vendore; përfshirjen e stimujve për partneritetin publik – privat, si dhe në qartësimi dhe zgjerimi i profileve të përfituesve. Këto ndryshime vijnë edhe në kuadër të ndarjes së re territoriale.
Me miratimin e strategjisë do të bëhet e mundur : Mbledhja e të gjitha të dhënave, vlerësimi i nevojave; rishikimi i ligjit të strehimit dhe procedurave për ndarjen e banesave sociale; nxitja e partneritetit publik-privat për ofrimin e strehimit social; përmirësimi i instrumenteve financiare për grupet në pozita të pafavorizuara.
Sipas draftit të strategjisë, parashikohet të ndryshohen edhe përcaktimi i kushteve minimale të banimit.
MONITOR
