Bashkitë nuk kanë mjaftueshëm fond për të përballuar detyrimin për të strehuar njerëzit e kategorisë që parashikon projektligji i ri i qeverisë për banesat sociale. Përfaqësuesi i Shoqatës së Bashkive të Shqipërisë, Agron Haxhimali, tha se me aq fond që jep qeveria për bashkitë, ata nuk ndërtojnë dot as edhe një shtëpi.
“Bashkitë e Shqipërisë sot marrin vetëm 1% të GDP-së nga qeveria qendrore, por mbledhin të ardhurat e veta dhe me kaq të ardhura nuk mund të ndërtohet 100 metra katrorë dhe jo më banesa sociale”, u shpreh Haxhimali.
Përfaqësuesja e Shoqatës për Autonomi vendore, Adelina Ferrici kërkoi që ligji të trajtojë edhe familjet që u prishen banesat apo nuk legalizohen për shkak të investimeve publike.
“Të shtohet edhe kategoria e të pastreve që ju prishte shtëpia, apo ju përjashtohet nga procesi i legalizimit dhe preken si rezultat i investimeve publike”, thotë Adelina Ferrici.
Projektligji “Për strehimin social”, që pritet të votohet së shpejti në Parlament, parashikon përfshirjen e disa kategorive të reja përfituese siç janë individët e komunitetit LGBT, ata të punonjësve të RENEA-s, FNSH-së, familje me ndihmë sociale por edhe favorizimin e ndërtuesve, kundrejt detyrimit për t’i dhënë shtetit një banesë të tillë.
