Turbulencat në skenën ndërkombëtare dhe konfliktet gjeopolitike po i detyrojnë individët më të kamur të globit të eksplorojnë alternativa të reja për të siguruar veten dhe pasuritë e tyre.
Një strukturë nëntokësore po merr formë në Zvicër, e konceptuar për ata klientë që janë të gatshëm të shpenzojnë shuma gjashtëshifrore në paund për një ambient të blinduar, i vendosur më shumë se 100 metra brenda një masivi shkëmbor.
Sipas raportimeve të “Daily Mail”, firma zvicerane Brünig Mega Safe ka në plan të hapë deri në 25 kavitete në shkëmbin gëlqeror të Brünigut, duke e kthyer pjesën e brendshme të malit në një rrjet të gjerë hapësirash të siguruara.
Tarifa për të pasur hyrje në këto ambiente fillon nga rreth gjysmë milioni paund, ekuivalente me mbi 580 mijë euro.
Këto kasaforta do të shërbejnë për të depozituar koleksione arti, automjete të epokës, verëra të çmuara, kasaforta personale dhe aktive të tjera me vlerë të konsiderueshme. Megjithatë, kompania i reklamon njëkohësisht si strehimore të përkohshme për njerëzit në rast të një krize madhore apo kataklizmi.
Gërmimet janë programuar të fillojnë në muajin janar, ndërsa objektivi i kompanisë është që shkalla e sigurisë të jetë e barazvlefshme me atë të Bankës Qendrore të Zvicrës.
Verifikimet e sigurisë do të jenë të shumëfishta
Aksesi në kompleks nuk do të jetë aspak i thjeshtë. Thomas Gasser, presidenti i Brünig Mega Safe, ka bërë të ditur se klientët do të duhet të përshkojnë disa pika verifikimi përpara se të futen në objekt.
“Fillimisht duhet të ndaloni në një pikë të veçantë inspektimi dhe të zbrisni nga makina juaj. Do të vendosen disa filtra sigurie, detajet e të cilave natyrisht nuk do të bëhen publike”, shpjegoi Gasser.
Pronarët do të kenë mundësi të hyjnë në çdo orë të ditës e natës përmes një tuneli me përmasa të tilla që lejon edhe kalimin e kamionëve. Sipas njoftimeve të kompanisë, tashmë janë firmosur kontrata qiraje me afat 99-vjeçar, dhe kasafortat e para pritet të jenë gati për përdorim brenda vitit të ardhshëm.
Kompleksi do të ketë mbikëqyrje të pandërprerë
Temperatura konstante 13 gradë, perfekte për verën dhe artin
Pozicionimi në thellësi të madhe sjell një përfitim shtesë. Temperatura natyrale brenda shkëmbit do të qëndrojë rreth 13 gradë celsius, një nivel termik optimal për konservimin e verërave dhe kryeveprave artistike.
Megjithatë, qëllimi i projektit nuk kufizohet vetëm te ruajtja e aseteve.
Në kontekstin e përshkallëzimit të tensioneve ndërkombëtare, ankthit për përplasje të armatosura dhe shqetësimeve mbi impaktin e ndryshimeve klimaterike, ambjentet nëntokësore mund të shndërrohen në vendstrehime të improvizuara gjatë emergjencave.
Kompania ka parashikuar gjithashtu mundësinë e ndërtimit të dhomave të personalizuara për klientët, duke përfshirë zona të izolimit, salla private për mbledhje dhe sallone.
Në afërsi të zonës është planifikuar edhe ngritja e një qendre formimi për sigurinë, analizën e riskut dhe teknikat e mbijetesës.
“Njerëzit synojnë të vënë në siguri një pjesë të pasurisë së tyre”
Sipas Thomas Gasser, kërkesa për ambiente me mbrojtje maksimale po shënon rritje të vazhdueshme vit pas viti, teksa të pasurit po rivlerësojnë sigurinë e destinacioneve që dikur i konsideronin të paprekshme.
“Për një periudhë të gjatë, Dubai shihej si një vend i sigurt. Tani, kjo ndjesi po vihet në pikëpyetje gjithnjë e më shumë. Njerëzit thjesht po kërkojnë të mbrojnë një fraksion të pasurisë së tyre”, deklaroi ai.
Zgjedhja e Zvicrës nuk është aspak e rastësishme. Ky vend ka një traditë të gjatë në shfrytëzimin e relievit malor për të ndërtuar struktura të mbrojtura. Shumë bunkerë të vjetër ushtarakë janë konvertuar me kalimin e kohës në kasaforta dhe qendra të dhënash.
Gjatë vitit 2024, Zvicra gjithashtu vuri në lëvizje një program për modernizimin e strehimoreve të saj antiatomike, si pjesë e masave përgatitore për një skenar të mundshëm lufte.
Në bazë të një ligji të miratuar në 1963, çdo banor në Zvicër, duke përfshirë shtetasit e huaj dhe refugjatët, ka të drejtën e një vendi në një strehimore të aftë për t’i mbrojtur nga rrezatimi bërthamor, armët biologjike dhe kimike, si dhe nga sulmet konvencionale në distancë të afërt.
Evropa rikthen fokusin te bunkerët
Interesi i shtuar për strehimoret nuk është një dukuri e izoluar vetëm në Zvicër. Në disa shtete të kontinentit, gatishmëria për një krizë të madhe ushtarake po e rikthen vëmendjen drejt infrastrukturës nëntokësore.
Një rast emblematik është Finlanda. Nën Helsinki, janë gërmuar më shumë se 5,500 hapësira të siguruara në formacionet shkëmbore nëntokësore, me një kapacitet total prej gati një milion personash.
Finlanda ka ngritur në mënyrë sistematike strehimore që prej vitit 1939, kur Bashkimi Sovjetik e sulmoi vendin duke shkaktuar Luftën e Dimrit. Që nga 1954, legjislacioni finlandez e ka bërë të detyrueshëm ndërtimin e strehimoreve nën godinat që kalojnë një sipërfaqe prej 1,200 metrash katrorë.
Nga bunkerët publikë finlandezë deri te kasafortat private që kushtojnë qindra mijëra paund, hapësirat nëntokësore po rimarrin një rol të spikatur në Evropë.
Në rastin e Brünigut, mbrojtja nga një katastrofë e mundshme ndërthuret me një element tjetër: luksin dhe sigurinë absolute që vetëm elita financiare mund ta përballojë.
