Strategjia e Ramës, ja kush janë 5 grupet që do riorganizojnë PS
Abstenimi i socialistëve në zgjedhjet e 21 qershorit për pushtetin vendor detyroi Partinë Socialiste të ndërmarrë një reformë të thellë organizative brenda saj. Për të rritur votat dhe për të bërë një përgatitje sa më të mirë për zgjedhjet e ardhshme parlamentare, Asambleja Kombëtare e Partisë Socialiste miratoi krijimin e tri grupeve të punës në funksion të rritjes së rezultatit elektoral, shkruan sot gazeta Panorama. Sipas saj, grupi për organizimin dhe koordinimin e fushatës kryesohet nga Gramoz Ruçi, dhe në përbërje të tij janë koordinatorët e gjashtë rajoneve, sipas të cilave PS ka bërë organizimin e saj elektoral.
Taulant Balla, Blendi Klosi, Saimir Tahiri, Lindita Nikolla, Ditmir Bushati dhe Koço Kokëdhima janë gjashtë koordinatorët e PS-së në të gjitha qarqet e vendit. Pjesë e këtij grupi janë dhe kryetari i Bashkisë së Tiranës, Erion Veliaj, kryebashkiaku i Vlorës Dritan Leli, ministri i Pushtetit Vendor Bledi Çuçi dhe deputeti i qarkut të Dibrës, Ulsi Manja.
Ndryshimet në statutin e Partisë Socialiste do të hartohen nga grupi i punës që drejtohet nga Fatmir Xhafaj, ndërsa në përbërje të tij janë ministrja për Marrëdhëniet me Parlamentin, Ermonela Felaj, ministri i Industrisë dhe Energjetikës Damian Gjiknuri dhe deputetët Bashkim Fino, Musa Ulqini, Namik Dokle dhe Vasilika Hysi.
