Me afrimin e sezonit veror, Autoriteti Kombëtar i Ushqimit (AKU), ka rritur kontrollin në njësitë e prodhimit dhe tregtimit të ushqimeve me qëllim, garantimin e sigurisë ushqimore për konsumatorët.
Burime nga AKU, bëjnë të ditur se, inspektorët e kontrollit ushqimor në të gjitha qarqet e vendit po menaxhojnë kontrollet në të gjitha njësitë e prodhimit, tregtimit dhe njësitë e restoranteve dhe fast food-eve, duke kaluar në “filtër”, produktet ushqimore që tregtohen jo vetëm në kryeqytet, ku fluksi i qarkullimit të tregtisë është më i lartë por edhe në rrethe të tjera të vendit.
AKU bën të ditur se inspektime rigoroze po ushtrohen kryesisht tani në sezonin e verës, kryesisht në njësitë tregtare në qytetet bregdetare që frekuentohen më së shumti nga turistë dhe pushues të ndryshëm. Objekt i punës së kontrolleve janë edhe tregjet që shërbejnë si “furnizues” të njësive të tjera ku kryhet një volum i madh qarkullimi i prodhimit vendas e importi të çdo lloji produkti, të cilët i ofrohen konsumatorit në disa lloje shërbimesh ushqimore.
AKU bën të ditur se në mos zbatim të ligjit të sigurisë ushqimore nga ana e subjekteve, do të ketë ndëshkim pa asnjë tolerancë sipas ligjit, duke aplikuar gjoba, sekuestrime, bllokime aktiviteti e referime për drejtësinë.
ATSH/d.i.
