Javanews/ Debatet mes Kryeministrit Rama dhe kandidatit Ben Blushi, pritet që të intensifikohen pas mbarimit të Kongresit në PS, i cili zhvillohet më 19 mars. Kjo pasi me miratimin e statutit të ri dhe vendimin për tu kryer referendumi, do të ketë një muaj kohë , që “sfidantët” të shpallin platformat e tyre për postin e kryetarit të selisë rozë. Pas 30 ditëve fushatë brenda selisë, çështja do t’i drejtohet kutive dhe votës së fshehtë.
Të paktën kështu parashikon ajo që deri më tani është projektstatuti i PS-së, i cili pritet të miratohet në Kongres, e të kthehet kështu rishtazi, në ligjin e ri themeltar të partisë socialiste.
Më konkretisht, në nenin 74 të projek-statutit, parashikohet formati dhe modalitetet e referendumit brenda partisë. Në nen thuhet se referendumi është i vlefshëm vetëm nëse në të merr pjesë në votim mbi 50% e anëtarësisë, dhe se iniciativa për të, duhet të ndërmerret nga Asambleja Kombëtare ose të paktën 20% e anëtarësisë së PS.
Në këtë pikë nuk ka asnjë problematikë, në kushtet kur tashmë, vetë kryetari e njëkohësisht Kryeministri Rama e ka bërë të qartë, që çështja e poltronit të socialistëve, do zgjidhet me referendum dhe votë të fshehtë.
Në po të njëjtin nen, ka dhe një specifikë, që thekson se nëse referendumi është i formatit vendimarrës, atëherë verdikti që del prej saj s’mund të jetë subjekt i një referendumi tjetër të paktën për dy vite.
Pra, thënë ndryshe, kjo pikë lë haësirë që, nëse nga referendumi del fitimtar Kryeministri Rama, atëherë ai nuk mund të cënohet në postin e tij, edhe sikur të humbë zgjedhjet parlamentare të vitit të ardhshëm.
Gjithçka pritet të jetë e qartë në Kongresin e 19 marsit, pasi i mbetet kësaj strukture që të vendosë për referendumin, në kushtet kur Asamblesë Kombëtare i ka mbaruar mandati.
