Fluturimet ajrore fituan terren kundrejt linjave detare, si për transportin e mallrave ashtu edhe të pasagjerëve. Instituti i Statistikave publikoi të hënën të dhënat zyrtare të sektorit të transportit.
Referuar të dhënave të janarit 2017 rezulton se ka një rritje të numrit të pasagjerëve por edhe të transportit të mallrave përmes linjave ajrore dhe një rënie të pasagjerëve e mallrave përmes linjave detare.
Në transportin ajror operojnë 15 shoqëri fluturimi dhe janë kryer 1.806 fluturime ajrore, duke shënuar një rritje me 9,3 %, ndaj janarit të vitit 2016. Ndërsa numri i pasagjerëve që kanë udhëtuar me linja ajrore gjatë muajit janar është rritur 28,6 %. Transporti ajror i pasagjerëve zë peshën më të madhe me 71,6 %.
Volumi i mallrave të ngarkuara/shkarkuara në porte është 218 mijë/ton. Krahasuar me janarin e vitit 2016, ky tregues është ulur me 10,3 %. Në portin e Durrësit janë ngarkuar/shkarkuar 97,7 %, e sasisë së mallrave të ngarkuar/shkarkuar në të gjitha portet.
Volumi i mallrave të transportuara me hekurudhë, për kilometër, është rritur 24,8 %, krahasuar me janar 2016, kryesisht transport ndërkombëtar. Volumi i mallrave të transportuar me ajër është rritur 5 %, në krahasim me Janar 2016.
Numri i pasagjerëve që udhëtojnë me linjë detare është 75.984 persona, krahasuar me Janar 2016, ky tregues është ulur 3,5 %./b.d