Që në fillimet e tyre në tregun e punës, gati 8% e të rinjve kanë pak shpresa për punë. INSTATI vëren se të rinjtë e dekurajuar për punë vijojnë të mbeten të shumtë.
Rreth 8% e të rinjve në vend janë të dekurajuar për mundësine e tyre të punësimit sapo dalin në tregun e punës. Anketa e publikuar nga INSTAT-i, flet për të rinjtë e moshës 15-29 vjeç. Të papunët e dekurajuar janë 7.8% e të rinjve ekonomikisht joaktivë. Ky është një nivel më i ulët krahasuar me ata që janë të pa shpresë për punë në moshë më të rritur, i cili arrin në 14%.
Por, ekonomistët e shohin si më shqetësuese rastin e pare, kur të rinjtë e marrin të mirëqenë se nuk do të mund të punësohen.
Specialistë të tregut të punës thonë se, vështirësia e të rinjve për t’u punësuar lidhet si me hapjen e pakët të vendeve të reja të punës, edhe me rritjen e moshës së daljes në pension. Prej tre vitesh, mosha e daljes së grave në pension po rritet në mënyrë të vazhdueshme .
Shkalla zyrtare e papunësisë për të rinjtë është mbi 28%, ose dy herë më e lartë se mesatarja e papunësisë në tërësi. Krahasuar me një vit më parë, papunësia tek të rinjtë ra 4 pikë përqindje, ndërsa krahasuar me tremujorin e mëparshëm papunësia e të rinjve shënoi rritje.
