Shoqata Shqiptare e Bankave, (AAB) bën të ditur se, sistemi bankar në vend ka vijuar të performojë pozitivisht duke shënuar një rritje me 2.4% në tremujorin e tretë të këtij viti.
Sipas të dhënave nga AAB, totali i aktiveve të sistemit bankar në fund të shtatorit arriti në 1.4 trilionë lekë, me një rritje prej 33 miliardë lekësh që nga tremujori i dytë.
Analistët e sektorit vërejnë se rritja e totalit të aktiveve, nuk është mbështetur shumë nga rritja e kredisë, që përgjatë gjithë tremujorit u rrit me vetëm 3 miliardë lekë. Por sipas tyre, rritja ka ardhur kryesisht nga rritja e zërit të vendosjeve në banka të tjera, çka, në thelb, tregon një tepricë likuiditeti që bankat nuk kanë gjetur mënyrën për ta investuar në instrumente shumë fitimprurëse.
AAB-ja bën të ditur se, gjate kesaj periudhe, sistemi bankar ndoqi një ecuri të kënaqshme edhe në treguesit financiarë. Përveçse sistemi është fitimprurës në tërësinë e vet, shumica e bankave rezultojnë me rezultate pozitive. Sipas të dhënave të paaudituara nga Shoqata Shqiptare e Bankave, 12 nga 16 banka gjithsej e mbyllën tremujorin e tretë të vitit me fitime pozitive./a.m.
