Shpejtësia mbi normat e lejuara nga makinat dhe moszbatimi i rregullave të qarkullimit nga këmbësorët janë shkaqe kryesore të aksidenteve në Shqipëri. Këmbësorë që kalojnë rrugën në mungesë të vijave të bardha, kalimtarë që ecin në korsinë e biçikletave apo biçikleta që lëvizin në rrugën e makinave janë disa nga shkeljet e sinjalistikës që Report Tv arriti të fiksojë në zonën e unazës së vogël në Tiranë.
Instruktori i drejtimit të mjeteve, Skënder Hasmeta, thekson mungesën e informacionit dhe të penaliteteve favorizon këmbësorët të thyejnë rregullat e qarkullimit.
“Sinjalistikë për të kaluar këmbësorët këtu nuk ka, ata futen me dashje aty dhe policia rrugore nuk ka çfarë iu bën këtyre tipave, as policia e rendit nuk ka çfarë iu bën sepse legjislacioni është i mangët, të paktën të vendosen masa administrative me gjoba, kur bëhen aksidente dhe këmbësori është fajtor të përgjigjet penalisht”, tha Hasmeta
Sipas Hasmetës edhe mungesa e kualifikimit të drejtuesve të mjetit është shkak për aksidente.
“Ca nuk ruajnë distancat, ca ecin shpejt, ca kryejnë frenime të gabuara, ca kryejnë ndalime të gabuara, nuk përdorin sinjalistikën shoferët gjatë lëvizjes në rrugë. Pjesa dërrmuese e shoferëve nuk kanë kaluar në autoshkolla nuk njohin as normat e sjelljes, as të sigurisë as kodin rrugor dhe përplasen kryesisht me këta që njohin rregullat”, u shpreh Hasmeta.
Të dhëna nga Ministria e Transporteve tregojnë se 71.4% e aksidenteve në vitin 2016 janë shkaktuar shpejtësia e mjeteve tej normave të lejuara, ndërsa 50% e tyre kanë ndodhur edhe nga pakujdesia e këmbësorëve në rrugë. Qytetet me numrin më të madh të aksidenteve janë Tirana me 1429 aksidente dhe Durrësi me 357 të tilla.
c.a
