Kryeministri i Britanisë, Keir Starmer, ditën e sotme do të zhvillojë një vizitë në Ukrainë së bashku me udhëheqës të tjerë botërorë për të theksuar mbështetjen e Britanisë për vendin në luftën kundër Rusisë, raporton BBC.
Keir Starmer do të shoqërohet në këtë vizitë nga Presidenti Macron i Francës, kryeministri polak Donald Tusk dhe Friedrich Merz, i cili bën vizitën e tij të parë në Ukrainë që kur u bë kancelar i Gjermanisë të martën.
Kjo është vizita e dytë e Starmer në Ukrainë si kryeministër.
Vendimi i udhëheqësve për të udhëtuar së bashku në Kiev është një përgjigje simbolike ndaj më shumë se 20 udhëheqësve që iu bashkuan Presidentit Putin në Moskë për përkujtimet e Ditës së Fitores në Rusi të premten.
Kryeministri dhe udhëheqësit e tjerë po e shfrytëzojnë vizitën për t’i kërkuar Rusisë “të bjerë dakord për një armëpushim të plotë dhe pa kushte 30-ditor”, një propozim i bërë fillimisht nga Presidenti i SHBA-së, Donald Trump.
Ata gjithashtu u zotuan të “shtojnë presionin mbi makinën e luftës së Rusisë”.
Në një deklaratë të përbashkët para mbërritjes së tyre në Kiev, Keir Starmer, Emmanuel Macron, Friedrich Mertz dhe Donald Tusk thanë se do të “qëndrojnë në Kiev në solidaritet me Ukrainën”.
Deklarata shton se ata do të bëjnë thirrje për një armëpushim të plotë dhe pa kushte 30-ditor, të propozuar për herë të parë nga SHBA-të në mars, i cili, sipas tyre, do të mundësojë zhvillimin e bisedimeve për një paqe të qëndrueshme.
“Ne jemi të gatshëm të mbështesim bisedimet e paqes sa më shpejt të jetë e mundur, të diskutojmë zbatimin teknik të armëpushimit dhe të përgatitemi për një marrëveshje të plotë paqeje”, thanë udhëheqësit, duke shtuar se do të “shtojnë presionin” mbi Rusinë derisa të bjerë dakord për një armëpushim të qëndrueshëm.
