Pas votës negative në unanimitet nga Këshilli Bashkiak i Bashkisë Shkodër, ka edhe një reagim nga ana e zyrtarëve të FSHF-së. Në një prononcim për “Panorama Sport”, Arben Dervishaj sqaron pretendimet e federatës dhe bën thirrje për këshilltarët shkodranë që të mendojnë për dëmin që i shkaktojnë qytetit të tyre me këtë votë. “Nuk dëmtohet federata, sepse ajo e ka një stadium, ka ‘Elbasan Arena’-n. Është Vllaznia dhe qyteti i Shkodrës që humbet shumë”, është shprehur ndër të tjera anëtari i Komitetit Ekzekutiv. “Nëse nuk miratohet marrëveshja, do të ndërpresim punimet, pasi pa para nuk mund të ndërtohet”.
Si e gjykoni mosmiratimin e marrëveshjes nga Këshilli Bashkiak i Shkodrës?
Gjykoj që nuk e kanë parë marrëveshjen fare. Këshilli ka pasur një muaj kohë dhe ka marrë një vendim që për mua është absurd. Më duken krejtësisht qesharake arsyet e ngritura. Nuk mund të reagohet ditën e mbledhjes për pretendimet që ka, kur ka pasur kohë të mjaftueshme që të ngrinte të gjithë kërkesat e mundshme. Është një pengesë artificiale që i bëhet qytetit dhe klubit Vllaznia.
Pretendimi i këshilltarëve është që kërkesat e federatës janë të tejkaluara në lidhje me përfitimet nga organizimet e ndryshme…
Unë e kam sqaruar edhe kryetarin e Këshillit Bashkiak dhe këdo këshilltar. Ne kemi kërkuar që të gjitha ato aktivitete që i organizon FSHF (ndeshjet e ekipeve kombëtare të të gjitha niveleve, Superkupa e Shqipërisë, e cila mund të vendoset të luhet në Elbasan ose në Shkodër) janë e drejtë e federatës dhe t’i menaxhojë ajo. Ndeshjet e klubit shkodran nuk mund t’i organizojë federata, sepse stadiumi është i Vllaznisë. Ne po i japim atij klubi një investim prej rreth katër milionë eurosh. UEFA kërkon përfitimet tona, që po investojmë kaq shumë në këtë impiant, ndaj është krejtësisht normale që të kemi këto kërkesa.
Mbi kë bie ky vendim?
Dëmin më të madh nuk e ka federata, por klubi Vllaznia, i cili dënohet që të mos luajë në stadiumin e tij. Madje, nuk arrij ta kuptoj Bashkinë e Shkodrës mbi pretendimet që ngre, pasi është federata që e përcakton se ku duhet të luajë Kombëtarja, apo edhe se ku do të zhvillohet finalja e Superkupës së Shqipërisë. Këshilltarët janë atje për të mirën e Shkodrës dhe jo të federatës, por duhet të dinë se çfarë humbjeje po i shkaktojnë qytetit.
Në lidhje me mirëmbajtjen e stadiumit. Kush duhet t’i përballojë kostot?
Ne propozuam dy opsione për bashkinë. I pari ishte që ta merrte federata në përdorim stadiumin dhe të përballonte edhe kostot e mirëmbajtjes. Gjithashtu, federata do të mirëkuptohej me klubin Vllaznia që të luante ndeshjet e saj pa asnjë pagesë në impiant, siç ndodh me “Elbasan Arena”-n. Ose, varianti i dytë që u propozuam ishte që ta shfrytëzonin ata stadiumin, ta mirëmbanin sipas standardeve europiane dhe sa herë që do të kishte aktivitete të federatës, të zhvilloheshin me këto kushte. Shkodra zgjodhi variantin e dytë. Dërguam një marrëveshje, për të cilën morëm edhe një përgjigje dhe në bazë të saj e riformatuam edhe një herë kontratën.
Çfarë ndryshon me afatet e përfundimit të impiantit?
Fondet tona në UEFA nuk mund të disbursohen pa marrëveshjen me Bashkinë e Shkodrës, ndaj presim një mbledhje sa më të shpejtë të këshillit. Në të kundërt, nëse nuk ka një të tillë (kam marrë një konfirmim nga kryetari i këshillit për një mbledhje urgjente në javën e ardhshme) që javën e ardhshme do të ndërpriten punimet. Pa para, nuk mund të ndërtohet.
PANORAMA SPORT
