Partia Demokratike përmes Enkelejd Slibeajt ka akuzuar sërish qeverinë dhe kryeministrin Rama në lidhje me projektin e stadiumit të ri Arena Kombëtare (Qemal Stafa). Sipas PD-së në aneksin e stadiumit ekzistues ishte parashikur krijimi i një lulishteje me një kënd lojërash për fëmijë, në kohën kur Bashkia drejtohej nga Basha, por sipas selisë blu, Rama ja ka falur këtë pjesë një bande kriminale që ka lidhje me Emiliano Shullazin.
“Më parë, kur bashkia drejtohej nga z. Basha, kjo zonë ishte parashikuar të bëhej lulishte, me kënd lojërash për fëmijët në shërbim të komunitetit. Por Edi Rama e ka fshirë këtë projekt, dhe ka në plan që tia japë bandës tjetër të preferuar, për të ngritur selinë e saj qendrore.
Bëhet fjalë për këtë truall që shihni në foto, në zemër të Tiranës, që nga lulishte jo vetëm për banorët e zonës por për mbarë qytetarët, shndërrohet në kullë betoni, kullë përfitimi, kullë zhvatjeje e korrupsioni.
Siç është bërë publike, banda e Shullazit me Edi Ramën mori pronën dhe truallin më të çmuar në mes të Durrësit, godinën historike të hotel Vollgës. Tashmë, Edi Rama po planifikon të shërbejë Shullazin dhe një bandë tjetër, lidhjet me të cilën janë të vjetra për të, qysh se u bë për herë të parë kryetar bashkie, me këtë truall në qendër të Tiranës.
I është sulur popullit me kërbaç e me burg e po i merr dhe kacidhen e fundit, ndërsa vetë ndan prona e troje, ndan pasurinë e vendit me bandat e kriminelët më të rrezikshëm në vend.”- tha Alibeaj i cili tregoi dhe këtë foto.
