Debatin për zgjedhjet e 11 majit, opozita dhe mazhoranca e zhvendosën në Strasburg në takimin e 19-të të Komitetit Parlamentar të Stabilizim Asociimit. Në emër të qeverisë, ministri i Shtetit, Taulant Balla tha se Shqipëria është më e përgatitur se kurrë për t’u bërë pjesë e familjes evropiane.
Ndalur te zgjedhjet, Balla tha se sipas opinionit të vëzhguesve ndërkombëtar 11 maji ishte konkurrues dhe u menaxhua me profesionalizëm. Kreu i grupit të PD, Gazment Bardhi shigjetoi SPAK, duke thënë se nuk pati asnjë rezultat për të parandaluar krimet zgjedhore.
“Nga 20 shkurti 2025, pak para zgjedhjeve e deri në përfundim, rezultoi që jo vetëm prokurorët e SPAK nuk u panë më në terren për krimet zgjedhore por nuk pati asnjë rezultat për të parandaluar krimet zgjedhore. Nëse rezultatet e këtyre hetimeve i marrim në 2030, nuk ndihmon as në ndikimin as në parandalimin e krimeve zgjedhore. Pyetja ime për Komisionin Europian është, “Na duhen rezultate konkrete apo na duhet të kemi në letër strategji të bukura që qëllimin mund ta kenë pozitiv, por në realitet nuk sjellin asgjë?”-tha Bardhi në fjalën e tij.
Jorida Tabaku tha se Kuvendi nuk ka qenë në gjendje të bëjë një reformë të plotë elektorale dhe se nuk janë zbatuar rekomandimet e OSBE-ODIHR.
“Më vjen keq të them që për 12 vitet e fundit parlamenti nuk ka qënë në gjendje të bëjë një reformë të plotë elektorale dhe ka të bëjë me vullnetin politik”, tha Tabaku.
Përgjigjen e mori nga Taulant Balla, i cili shprehu gatishmërinë për të nisur me punën nga shtatori.
“Ritheksojmë nevojën për të filluar në shtator dhe vijuar me reformën elektorale. Në reformën tjetër duhet të kemi dispozita në kodin elektoral për nënyrën se si zgjidhen anëtarët e Parlamentit Europian”, tha Balla.
Ky takim dy ditor do të ketë në qendër të vëmendjes së diskutimeve integrimin e Shqipërisë në veçanti zbatimin e Marrëveshjes së Stabilizim Asociimit. Të Drejtat e njeriut, Shteti ligjor, Ekonomia, Media dhe Pakicat janë 5 pikat që do të diskutohen mes palëve, si pjesë e procësit të integrimit që ka nisur vendi ynë.
Detyra e Komitetit Parlamentar të Stabilizim-Asociimit BE-Shqipëri janë shqyrtimi i të gjitha aspekteve të marrëdhënieve ndërmjet BE-së dhe Shqipërisë dhe në veçanti, zbatimin e Marrëveshjes së Stabilizim Asociimit. Komiteti mblidhet dy herë në vit, një herë në Tiranë dhe një herë në Bruksel ose Strasburg.
Anëtarët e Komitetit (pala shqiptare dhe ajo e BE-së) diskutojnë tematika që kanë të bëjnë me Shtetin Ligjor, Korrupsionin, Përshtatjen e Politikës së Jashtme me atë të BE, si dhe miratojnë rakomandimet. Rekomandimet do të konsiderohen të miratuara nëse marrin mbështetjen e shumicës së anëtarëve të delegacionit të Parlamentit Evropian dhe të delegacionit të Parlamentit të Shqipërisë, të pranishmëm në takim.
