Sqarim për Kryeministrin, që duket se nuk po kupton thelbin e revoltës rinore!

Nga Silvana Begaj

Zoti Kryeministër,
Ata që dalin sot në shesh, në gjithë Shqipërinë, në çdo qytet dhe në çdo cep të diasporës, nuk kanë dalë kundër Shqipërisë.!
Nuk kanë dalë kundër investimeve.
Nuk kanë dalë kundër integrimit europian.
Nuk kanë dalë kundër zhvillimit.
Përkundrazi!
Janë njerëz që e duan Shqipërinë. Duan Shqipërinë e shqiptarëve. Janë njerëz që ende besojnë se ky vend meriton më shumë se fasada, më shumë se propagandë, më shumë se largime të të rinjve dhe më shumë se korrupsion masiv.
Ata nuk kundërshtojnë zhvillimin!
Ata kundërshtojnë errësirën me të cilën zhvillimi u serviret.
Kundërshtojnë mungesën e transparencës, mungesën e llogaridhënies dhe arrogancën që e quan çdo pyetje sulm, çdo kritikë tradhti, çdo qytetar protestues armik.
E ti këtë e di mirë! Je inteligjent dhe e lexon mirë pse ka lindur kjo revoltë masive. E di mirë se populli është ngopur me premtime gjatë fushatës dhe me arrogancë pas zgjedhjeve.
Shqiptarët nuk kanë dalë në shesh sepse duan kaos. Kanë dalë sepse sistemi i tërheq zvarrë kur do, i lodh kur do, i shpërfill kur do. Sepse ligji shpesh u shfaqet si shkop për të dobëtit dhe si ombrellë për të fortët.
Kanë dalë ata që nuk i kanë më fëmijët në shtëpi. Ata që i përcollën në aeroporte me ankth dhe tani i shohin vetëm në ekranet e telefonit. Shqipëria u mbeti në mur si fotografi, ndërsa fëmijët iu bënë fuqi punëtore botës.
Kanë dalë pensionistët që punuan me ndershmëri një jetë të tërë dhe sot numërojnë qindarkat me të njëjtin kujdes që dikur numëronin ditët e punës.
Kanë dalë qytetarët që përballen çdo ditë me administrata të ngadalta, të paafta, të korruptuara dhe shpesh indiferente ndaj halleve të njerëzve.
Kanë dalë ata që kanë njerëz të sëmurë, që presin ilaçe kundër kancerit apo gjak kur e kanë nevojë jetike, ndërkohë që shteti ynë zgjedh të prioritizojë çështje që nuk janë urgjenca e plotësimit të nevojave themelore, ilaçeve dhe jetës së përditshme të qytetarëve.
Kanë dalë ata që kritikojnë klanet që ke formuar nën çadrën tënde dhe që janë pasuruar nga taksapaguesit dhe pasuritë e shqiptarëve.
Kanë dalë se janë kundër piramidës së pushtetit që ke krijuar duke promovuar ata që kanë probleme me ligjin.
Dhe mos mendoni se kanë dalë për t’i dhënë pushtetin një pale tjetër. Shumë prej tyre nuk besojnë më te askush: as te ju, as te opozita e vjetër dhe as te “partitë cadra” që krijohen sa herë i duhet sistemit.
Shqipëria është e shqiptarëve. As atyre majtas dhe as djathtas!
Nuk është pronë e asnjë partie!
Nuk është pronë e asnjë politikani!
Hapini dyert grupeve të diasporës që punojnë aktivisht për të mirën e Shqipërisë.
Dhe mos harroni: kur shqiptarët dalin në shesh, ndoshta nuk duhet t’i pyesni kë duan të rrëzojnë dhe kë të ngrenë.
Duhet t’i pyesni pse kanë humbur durimin dhe cilat janë arsyet që kanë shkaktuar këtë revoltë masive!
Kur të fuqishmit vjedhin të varfrit, e quajnë biznes.
Kur të varfrit reagojnë, e quajnë dhunë.
M.Twain