Sportistët shqiptarë në “Rio 2016” dhe trajnerët e ekipit shpresojnë të bëjnë një paraqitje dinjitoze për vendin. Në një lidhje direkte me “News 24”, ata shprehën optimizmin për rezultate pozitive në lojërat olimpike.
Garuesi në sportin e notit, Sidni Hoxha, tha se “Jemi gati për garë!”.
Ndërsa Elez Gjoza, duke folur për objektivat e peshëngritjes tha se “Gara do të tregojë gjithçka, ndërsa objektivi ynë është vendi i tretë deri te i gjashtë. Jemi krenarë që përfaqësojmë delegacionin për Shqipërinë. Ne do të jemi shumë të kujdesshëm në mënyrë që asnjë nga ne të mos skualifikohet dhe të bëjmë një përfaqësim dinjitoz”.
Për mjekun që shoqëron ekipin e sportistëve në Rio, “Sportistët janë gati. Ekipi është vendosur në kushte shumë optimale. Poliklinika është e pajisur me të gjitha shërbimet. Jemi në dispozicion edhe me fizioterapinë tonë, kemi marrë aparatura edhe nga Shqipëria”.
Në Lojërat Olimpike Verore “Rio 2016” do të marrin pjesë gjashtë sportistë shqiptarë. Në këtë garë, Shqipëria do të konkurrojë me Luiza Gegën (atletikë), Nikol Merizaj (not), Izmir Smajlaj (atletikë), Sidni Hoxha (not), Briken Caljes (peshëngritje) dhe peshëngritësen Evagjeli Veli.
