Kryeministri Edi Rama, në rubrikën “Sy m’sy” në Facebook, i ktheu përgjigje një komentueseje e cila i thonte kreut të qeverisë se spitale janë bërë, “por janë kot se korrupsioni aty vazhdon”.
Rama u shpreh: “53 spitale të reja, 10 që nuk ekzistonin, 43 që u shembën dhe u ribënë nga e para me standarde europiane. E morëm Shqipërinë me spitale të viteve ’60 dhe që vetëm ishin arnuar në vitet ’90 e 2000. Mjekët heronj, jepnin e merrnin si në luftë në mes të Europës, në shekullin XXI. Autoambulancat ndizeshin me të shtyra dhe urgjencat vareshin nga oraret e gjumit të rojeve që i linin hapur telefonat”.
“Sot kemi edhe 400 qendra të reja shëndetësore, kemi urgjenca me aparatura, mjekë dhe infermiere të mirëpaguar. Kontrollojmë gati gjysmë milionë njerëz në vit me analiza falas… Ka plot akoma, por po ndalem këtu, duke thënë se Qendra Spitalore Universitare “Nënë Tereza” ka nisur bashkëpunimin dhe do të njehsohet me qendrën shëndetësore në Izrael, do të ndërtojmë gjatë mandatit të katërt dy spitale ultramoderne, në bashkëpunim me Emiratet e Bashkuara dhe me strukturën më të mirë spitalore të Italisë. Këto do të sigurojnë që mos të kemi më nevojë të çojmë njerëzit jashtë për operacione të ndërlikuara. Madje do të vijnë shqiptarët nga jashtë”, shtoi kryeministri.
