Shqipëria dhe Bullgaria pritet të rritin bashkëpunimin e ngushtë mes dy parlamenteve dhe shkëmbimin e vizitave të nivelit të lartë në kuadër të procesit të integrimit europian.
Këto ishin dy nga propozimet e kryeparlamentares Elisa Spiropali dhe homologes së saj, Nataliya Kiselova, të bëra gjatë vizitës së zyrtares shqiptare në Bullgari.
“Ne, shqiptarët, jemi krenarë që kemi një vend mik e partner si Bullgaria, e cila është ndër mbështetësit më të fuqishëm të objektivit tonë kombëtar për t’u anëtarësuar në Bashkimin Europian brenda vitit 2030. Shqipëria është në pararojë të vendeve kandidate drejt BE-së dhe konstatojmë me kënaqësi që ky plan, i cili ka fituar mbështetjen e Parlamentit Europian, Komisionit Europian dhe parlamenteve të mjaft vendeve anëtare, ka edhe mbështetjen e vendosur të Asamblesë Kombëtare dhe të Bullgarisë. Përshpejtimi i anëtarësimit të vendeve të Ballkanit Perëndimor, si një proces i mbështetur në meritën dhe një prioritet i zgjerimit, është i rëndësishëm edhe për vetë Bashkimin Europian. Jetojmë në kohë të trazuara dhe një Europë më e madhe do të thotë një Europë më e fortë dhe më e sigurt,” u shpreh znj. Spiropali.
Kryeparlamentarja shqiptare është e para kryetare Kuvendi që pritet nga znj. Kiselova, e cila është zgjedhur rishtas në detyrë. Nga ana e saj, znj. Kiselova vlerësoi arritjet e Shqipërisë drejt anëtarësimit në Bashkimin Europian, si dhe miratimin e fundit nga Parlamenti Europian të Rezolutës për Shqipërinë, e cila u votua nga të gjithë eurodeputetët bullgarë.
“Objektivi i Shqipërisë për anëtarësim brenda vitit 2030 ka mbështetjen e vendosur të Bullgarisë dhe plani i juaj është edhe i yni. Asambleja Kombëtare e Bullgarisë, përveç mbështetjes politike, do t’i japë edhe ndihmë teknike Kuvendit në procesin e integrimit europian,” tha kryeparlamentarja Kiselova.
Kjo ishte dita e dytë e vizitës zyrtare të znj. Spiropali në Sofje. Më herët gjatë ditës, në shoqërinë e znj. Kiselova, ajo vendosi një kurorë me lule në Monumentin e Ushtarit të Panjohur në Sofje. Ndërkohë, një ditë më parë kryeparlamentarja u prit në takim nga kryeministri bullgar Rossen Jeliazkov.
