Ministrja e shtetit Elisa Spiropali ka uruar Kosoven per 15 vvjetorin e pavaresise, duke nenvizuar se eshte nje realitet i gjalle
Spiropali tha se Kosova eshte nje yll me teper ne harten evropiane, eshte nje3 dite e madherishme, por dhe nje moment reflektimi per te kujtyuar te shkuaren nga vijme dhe per te kuptuar dhe ndertuar te ardhmen
Postimi i Spiropalit:
Gëzuar Kosovë.
Gëzuar motra dhe vëllezër.
Gëzuar Pavarësinë dhe Republikën Evropiane.
Nuk është më ëndërr. Është realitet i gjallë.
Nuk është më pritje. Është shpresë e realizuar.
Prej 15 vitesh Kosova është tashmë një yll më tepër në hartën evropiane.
Shqiptarët e Kosovës, qytetarët më të rinj të Evropës, janë ata që ndodhen aty ku historikisht dhe gjeografikisht kanë qënë, aty ku vullneti i të shkuarës dhe të ardhmes së tyre ka ndërtuar të sotmen dhe të nesërmen e ëndërruar të gjithë atyre që u sakrifikuan.
Kjo ditë e madhërishme feste, Dita e Pavarësinë së Kosovës, është gjithashtu moment reflektimi për të kujtuar të shkuarën nga vijmë për të kuptuar dhe ndërtuar të ardhmen ku shkojmë.
Në këtë pikë takimi me historinë, një blatim mirënjohjeje të pafundme kam për gjithë ata breza shqiptarësh që bënë histori në një kalvar të pashembullt sakrificash për të ngritur piedestalin e Lirisë. Nga Rugovët tek Jasharët, nga Demaçët tek Thaçët, për të kulmuar tek epopeja e lavdishme e UÇK-së dhe gjithë popullit të Kosovës, që luftoi për paqen dhe dëshmoi se paqa është më e fortë dhe më e vlefshme se çdo luftë gjakatare.
Kosova ishte guri i fundit i dominosë ballkanike që e ndau gadishullin e trazuar nga e shkuara dramatike drejt rrugëtimit evropian duke i dhënë shans e shpresë për bashkëjetesë popujve të djepit të demokracisë, për t’i dhënë fund të qënit “fuçi baruti” aty ku urrejtja dhe konflikti ata popuj i ndante me kufij gjaku.
Kosova u bë dëshmia e luftës së parë morale në Evropën e pasluftës në emër të të drejtës së një populli për të vendosur Fatin e tij. Kosova dëshmoi gjithashtu se nacionalfashizmi është një besim i vdekur, dhe se diktatorët, herët a vonë, gjithmonë përfundojnë rrangalla arkaike në bodrumet e historisë.
Lufta e NATO-së, nën flamurin euroatlantik në vitin 1999 do të mbetet flamuri i paqes dhe garanti i saj.
Mirënjohje. Mirënjohje e thellë dhe e pakushtëzuar për presidentin Klinton e kryeministrin Blair dhe gjithë ata gra e burra që u rreshtuan pamëdyshje në frontin e humnanizmit kundër barbarisë dhe marrëzisë gjakatare së të shkuarës.
Ky është shekulli i shqiptarëve. Ditët më të mira për shqiptarët janë ende në pritje për të ardhur.
Sot bota është duke jetuar ditë të liga. Një tjetër diktator sulmon një popull heroik në emër të ideologjisë perandorake dhe sërish bota e qytetëruar është në luftë për Lirinë.
Ukraina sot ndeshja e dy botëve, nesër do të jetë triumf i të mirës mbi të keqen.
Kosova është dëshmia e djeshme e lirisë së nesërme të Ukrainës së sotme.
Gëzuar motra e vëllezër, gëzuar Kosovë, Gjakovë, Gjilan, Drenicë, Pejë, Istog, Podujevë, Prizren, Mitrovicë, e çdo pëllëmbë e Kosovës Evropiane.
Gëzuar pavarësinë Prishtinë, Kryeqyteti i sotëm, i kahershëm dhe i përjetshëm i Kosovës në pritje të bashkimit pa kufij.
