Ish-ministri i Punës dhe Çështjeve Sociale Spiro Ksera, i arrestuar disa ditë më parë me akuzën e përvetësimit të fondeve publike nëpërmjet mashtrimit ka paeluar vendimin e gjykatës së shkallës së parë.
Ksera i është drejtuar Gjykatës së Apelit ku ka kërkuar ndryshimin e masës së sigurisë “arrest me burg” që vendosi shkalla e parë.
Kërkesa e Kserës pritet të shqyrtohet këtë javë nga kjo gjykatë.
Dosja e Prokurorisë:
Prokuroria e Tiranës ka krijuar dyshime se ish-ministri Punës dhe Çështjeve Sociale, Spiro Ksera, i cili u ndalua mbrëmjen e së Premtes (dt. 29.01.2016), ka kryer veprën penale të “vjedhjes duke shpërdoruar detyrën” nëpërmjet procedurave fiktive për organizimin e disa aktiviteteve social-kulturore gjatë vitit 2013.
Prokuroria e Tiranës, Njësia Task-Force, ka zhvilluar hetimet në bazë të kallëzimit të Kontrollit të Lartë të Shtetit. Në kuadër të veprimeve proceduriale, janë krijuar dyshime të arsyeshme se ish-ministri Ksera, në cilësinë e kryetarit të Entit Prokurues, në bashkëpunim me ish-drejtorin e Kabinetit, Klevis Bitro, si edhe me mbështetjen e disa zyrtarëve të tjerë, kanë vjedhur 30 milionë lekë të reja nga buxheti i shtetit.
Këto shuma financiare, ish-drejtuesit e lartë të Ministrisë së Punës i kanë akorduar për disa aktivitete për shtresa të ndryshme sociale, por që faktikisht këto evente nuk janë realizuar, ose janë realizuar me kosto shumë më të ulta nga ato që janë shënuar në dokumenta.
Në bazë të veprimeve proceduriale, rezulton se janë kryer pagesa për aktivitetet që nuk janë kryer, si më poshtë:
1-“Prioriteti i minoriteteve-Barazi në të drejta”;
2- “Kapërceni paragjykimet-Njihni romët”;
3-“Ne sfidojmë të gjithë sëbashku”;
4-“Të ndryshëm, por të barabartë”;
5-Përfshirje sociale-Drejtësi sociale”
6-“Mosha e tretë, vlerë për shoqërinë”.
