Spinaqi i përket familjes chenopodiaceae, së njëjtës familje që i përket panxhari, rrepa dhe quinoa. Spinaqi njihet kryesisht si një burim force, siç është bërë i famshëm në filmin e animuar “Popeye”. Marinari i dashur për fëmijët, sa herë që ishte në rrezik, hante një konservë spinaqi dhe krahët i fryheshin, duke i mundur armiqtë që i dilnin përpara. Gjithsesi, edhe pse spinaqi ka shumë të mira, nuk është se të bën me muskuj nga çasti në cast.
Spinaqin mund ta gjesh gjatë gjithë vitit, por kohën e ka në periudhën mars-qershor. Është i njohur për vetitë e tij ushqyese dhe gjithmonë është thënë për të se të jep energji, të rrit vitalitetin dhe përmirëson cilësinë e gjakut. Ka disa arsye pse spinaqi ka veti të tilla dhe kryesorja është se përmban hekur. Hekuri luan rol të madh në funksionimin e qelizave të kuqe të gjakut, që ndihmojnë në transportimin e oksigjenit në trup, prodhimin e energjisë dhe sintezën e DNA-së. Spinaqi është edhe një burim i shkëlqyer i vitaminës K, A, C, B2, acideve folike dhe magnezit. Vitamina K është e rëndësishme për të mbajtur të shëndetshme kockat dhe vështirë se gjen perime të tjera që përmbajnë më shumë vitaminë K se spinaqi.
Gjethet jeshile me shkëlqim të spinaqit jo vetëm që janë më tërheqëse për syrin, por janë edhe më të ushqyeshme. Studimet kanë treguar se ato përmbajnë më shumë vitaminë C sesa gjethet që kanë një ngjyrë të zbehtë.
Një përbërës ushqyes që është gjetur kohët e fundit në spinaq është edhe glikoglicerolipidi. Ai është i domosdoshëm për fotosintezën në të gjitha bimët, por glikoglicerolipidi i spinaqit ndihmon edhe në mbrojtjen e sistemit tretës të njeriut.
Spinaqi përmban gjithashtu karotenoidë dhe flavonoidë. Ai është një nga perimet e pakta që nuk humb vlerat edhe kur zihet.
Shije
